Энэ сарын 11-ны өдөр нийслэл хотод гэмт этгээдүүд бүлэглэн Хятад улсын Ван, Ли овогт хоёр иргэний 210 сая төгрөгийг дээрэмдэн, амийг нь зэрлэгээр хөнөөсөн хэрэг гарсан билээ. Энэ тухай манай сайт товч мэдээлсэн. Уг хэргийн холбогдогчдыг Дархан, Сэлэнгийн цагдаагийн хүчийг дайчлан Орос руу зугтаж гарахаас нь өмнө баривчилсан юм. Одоо мөрдөн шалгах ажиллагаа явагдаж байгаа.
Энэ хэрэгтэй холбогдуулан Монгол-Өвөр Монголын бизнес, хөрөнгө оруулагчдын холбоо, Жэжиан-Монголын эдийн засаг, худалдааг дэмжих нийгэмлэг, БНХАУ-аас Монгол улсад хөрөнгө оруулагчдын Зун-Хуа нийгэмлэгээс мэдэгдэл гаргажээ. Энэ мэдэгдэлд “…Монголд байгаа Хятадын хөрөнгө оруулалттай аж ахуйн нэгжүүд болон Хятад хүмүүс мөн цагаачид энэхүү мэдээг дуулаад бухимдалтай байгаа. Үүний зэрэгцээ уг хэрэг олон улсын олон нийтийн дургүйцлийг хүргэж байна. …Монголын Засгийн газар болон нийгмийн бүхий л салбар хэрэгтэнг шударгаар шийтгэж өгөхийг хүсч байгаа…” гээд “…шударга ёсыг сахих нь аль ч улс орны дагаж мөрдөх энгийн журам юм…” гэсэн байна. Мөн хохирогчдын ар гэрийнхэнд хүмүүнлэгийн тусламж үзүүлэхийг хүсч, мэдээллийн үнэн бодит, тэнцвэрт байдлыг хангах, хөрөнгө оруулалтын орчин нөхцөлийг сайжруулахыг шаарджээ.
Б.Баяр

Эх сурвалж: Tumen.mn