нийтлэсэн Admin

Хятадын Шандун мужид цагдаагийнхан 37 нярай хүүхэд болон гурван настай охиныг хүүхдийн наймааны золиос болохоос аварчээ.

Нярай хүүхдүүдийг 50-80 мянган (15-25 сая орчим төгрөг) юаниар худалддаг байсан бөгөөд хөвгүүд нь охидоосоо харьцангуй өндөр үнэтэй байсан гэнэ.

Хүүхдүүдийг худалдан авагчдад хүргэхийн тулд том цүнхэнд хийн зөөвөрлөж байсан ба бэлэн гоймон болон ногооны хаягдлаар хооллож байжээ. Хууль сахиулагчид уг хэрэгт холбогдуулан 103 хүнийг сэжиглэн баривчилсан байна.

Өнгөрөгч долоодугаар сард эргүүлийн цагдаа нар тус улсын Жинин хотын нэгэн хаягдсан  үйлдвэр рүү жирэмсэн эмэгтэйчүүдийг бүлэг эрчүүд учир битүүлгээр дагуулан орж байсныг харсан байна.

Улмаар мөрдлөг явуулахад хэргийн газрын ойр орчмоос хүүхдийн живх болон тухайн газрыг нууцлагдмал “төрөх тасаг” болгон ашиглаж байсныг нотлох бусад баримтууд олдсон байна. Жирэмсэн эмэгтэйчүүд хүсээгүй хүүхдээ тэнд нууцаар төрүүлчхээд бусдад үрчлүүлэхээр хүүхдийн наймаачдад худалддаг байсан гэнэ.

“Тэнд хүүхэд худалдаалах гэмт хэрэг цэцэглэж байсныг бид илрүүлсэн” хэмээн Олон нийтийн аюулгүй байдлын яамны Хүний наймааны эсрэг газрын захирал Чен Шизү мэдэгджээ.

Тэрбээр цааш нь “зарим гэмт хэргийн бүлэглэлүүд төрөх дөхсөн жирэмсэн эмэгтэйчүүдтэй уулзаж, тэднийг нийтийн тээврээр өөр хот руу явуулж, улмаар төрснийх нь дараа хүүхдүүдийг нь худалдчихдаг байсан” гэв.

Дээрх хэргийг шалгаж буй мөрдөгчийн хэлснээр тэд маш бохир, таагүй орчинтой үйлдвэрийн эзгүй байрнаас долоон сэжигтэн баривчилж, бүтээлгэн дор бүтэх гэж байсан нэг хүүхдийг олсон байна. “Тухайн үед хүүхдийн царай хөхөрсөн байсан. Хэрвээ бид түүнийг олоогүй байсан бол хэдийнэ эндэх байсан” хэмээн цагдаагийн мөрдөгч Лиү Янг хэлжээ.

“Бидний аварсан 37 хүүхдийн нэг нь ч эрүүл чийрэг бус, бүгд ямар нэг өвчтэй байсан” хэмээн нутгийн цагдаагийн офицер Хоу Жүн ярьсан байна. Хүүхдүүдийн зарим нь ДОХ-ын  вирус, бэлгийн замаар дамждаг халдварт өвчтэй байсны зэрэгцээ тэжээлийн дутагдалтай байжээ.

Хүүхдүүдийг дараагийн худалдан авагчдад хүргэхээс өмнө ойролцоох халдварын эмнэлэгт аваачдаг байсан бөгөөд тэндээс хүүхэд үрчлэх гэж буй шинэ эцэг эхчүүд нь авдаг байсныг тогтоожээ.

Тэдгээр хүүхдүүдийн зарим нь шинэ гэр бүлдээ үлдсэн бол заримыг нь асрамжийн газар үрчлүүлсэн байна. Мөн худалдагдах гэж байсан гурван настай охиныг ээжид нь буцаан өгсөн бөгөөд хамаатан садан нь охиныг гэмт хэргийн бүлэглэлтэй хуйвалдан зарах гэж байжээ.

БНХАУ-ын хуулиар гурваас дээш хүүхэд худалдсан гэмт хэрэгтэн 10 хүртэлх жилээр хоригдох, түүнээс хүнд гэмт хэрэг үйлдсэн тохиолдолд цаазын ял оноодог юм байна.

Эх сурвалж:  Shuurhai.mn