Байгаль орчныг хамгаалах чиглэлээр гаргасан хуулиудын дотроос хамгийн их маргаан, тэмцэл дагуулж буй нь “Урт” нэртэй хууль болоод байгаа билээ. Энэ хуулийн дагуу 100 гаруй уул уурхайн компаниудын лицензийг цуцалсан нь тэдгээр компаниудыг хүнд байдалд оруулсан. Хайгуул, ашиглалтын зардлаа төрөөс нэхэмжлэх гэсэн боловч мөнгөгүйн улмаас төлж чадаагүй байгаа. Иймээс энэ хуульд нэмэлт өөрчлөлт оруулах, хуулийг хэрэгжүүлэх тухай хууль гаргах зэрэг санал санаачлагыг зарим улс төрчид тавьж буй. Гэвч “Дэлхийн ногоон монгол нэгдэл”, Босоо хөх монгол” зэрэг иргэний байгууллагууд “Урт” нэртэй хуульд өөрчлөлт оруулахыг эсэргүүцэж байна. Тэд ойрын сар, өдрүүдэд улс орныг хамарсан эсэргүүцлийн арга хэмжээ зохион байгуулахаа мэдэгдэж байгаа ажээ.

Б.Баяр

Эх сурвалж: Tumen.mn