Нөгөө л улиг болсон БХЯ-ны 300 айлын орон сууцны асуудал дахин сөхөгдөж эхэллээ. Учир нь бүтэн дөрвөн жилийн хугацаанд байртай болно хэмээн мөрөөдөж явсан тус яамны алба хаагчид өнөөг хүртэл хохирч, өрөндөө баригдсаар яваад хэргийн гол учир буй. Байртай болох гэсэн тэдний мөрөөдөл рүү нь ус цутгасан хүн нь бидний сайн мэдэх УИХ-ын гишүүн асан Батж.Батбаярын хүү “ХӨМОТЭ” компанийн захирал Б.Баттулга гэгч эрхэм. Бид энэ хүний нэрийг сайнаасаа илүү саараар сонсч байсан.
Асуудлын гол нь тухайн үед БХЯ-ны сайд байсан Лу.Болд өөрийн дотны анд Батж.Батбаярын хүүд энэхүү 300 айлын орон сууц барих тендерийн ажлыг шууд л ногоон гэрлээр өгснөөс болж өнөөдөр уг барилга хэзээ ашиглалтад орох нь тодорхойгүй байгаа. Тиймээс л тэрхүү орон сууцанд орохоор хуруу, хумсаа хуйхлах шахам байж энд, тэндээс таван сая төгрөг олсон төрийн албан хаагчид одоогийн сайд Ц.Цолмонд өргөх бичиг барихаар зэхэж буйгаа бидэнд хэлсэн юм.
Өөрөөр хэлбэл, тухайн үед цэвэр, бохир ус, халаалтын системийн техникийн нөхцлийн асуудлыг шийдэхийн тулд 1 тэрбум 700 сая төгрөгийн асуудлыг яаралтай шийдэж, мөнгө босгох хэрэг гарч байсан аж. Тиймээс л орон сууцанд орохоор захиалга өгсөн ажилчдаасаа, айл тус бүрээс таван сая төгрөг гаргуулж “ХӨМОТЭ”-гийн захирал Б.Баттулгад өгч байсан байна. Уг нь 2011 оны есдүгээр сард 300 айлын барилгын 9.9 тэрбум төгрөгийг мөн л “ХӨМОТЭ” компанийн данс руу шилжүүлжээ. Хачирхалтай нь ажил эхлэх байтугай суурийнхаа нүхийг ч ухаагүй байхад нь ийнүү энэ их хэмжээний мөнгийг шилжүүлсэн юм.
Тэгэхээр тухайн үеийн сайд байсан УИХ-ын гишүүн Лу.Болд өөрийнхөө эрх мэдэл албан тушаалаа ашиглан улсын төсвийн 9.9 тэрбум төгрөгийг зүгээр л андынхаа хүү Б.Баттулгад найр тавин өгсөнд хамаг учир оршиж буй юм. Үүний балгаас болж өнгөрсөн оны нэгдүгээр сард БХЯ-ны Бодлогын хэрэгжилтийг зохицуулах газрын дарга асан, хурандаа Х.Батсайхан, Санхүүгийн хэлтсийн дарга асан, хурандаа Д.Жаргалсайхан нар саатуулагдан, хоригдож байсан үе ч бий. Одоо хүртэл энэ асуудал хуулийн байгууллагад шалгагдсаар л байгаа. Тухайлбал, дээрх 300 айлын орон сууцны асуудлаас болж Батж.Батбаярын хүү Б.Баттулгыг АТГ-аас саатуулан цагдан хорьж байгаад, батлан даалтад гаргаж байсан.
Харин бидэнд олдсон мэдээллээр түүний хэргийг АТГ шалгаж байхад нь Нийслэлийн прокурорын газраас татан авч, шалгаад буцаан АТГ-руу шилжүүлсэн байна. Тиймээс барилга барина хэмээн түүний анх авсан 9.9 тэрбум төгрөгийн асуудлыг АТГ болон хуулийн байгууллага эхнээс нь сайтар нягтлан шалгаж, энэхүү мөнгө хэний гараар, хаашаа, яаж орсон, эл тендерийг ямар бичиг баримт бүрдүүлж авсан бэ гэдгийг нь дахин шалгахаар болсон гэсэн үг. Тиймээс 300 айлын энэхүү орон сууцны мөнгөний асуудал маш олон дарга, цэргийг асуудалд оруулах болоод байгаа юм. Уг нь нь тухайн үеийн салбар яамны удирдлагуудад Сангийн яамнаас “ХӨМОТЭ” компанийг шалгаруулж болохгүй. Тус компани олон тэрбум төгрөгийн өрийн асуудалтай гэж албан бичиг илгээж байсан аж.
Гэтэл зүсээ хувирган “ХӨМОТЭ” гэх компани байгуулан эл 300 айлын орон сууцны барилга барих ажил авсныг сайд, дарга нар одоо “мэдэхгүй” хэмээн мэлзэж байгаа гэнэ. Яаж ч бодсон андынх нь хүү өөрийнхөө нэр, усаар компанийн захирал гэж бүртгэгдсэн байхад Лу.Болд сайд болон түүний гар, хөл бологчид “ёстой мэдсэнгүй” гэх үгийг одоо хэлж байгаа нь гайхалтай. Хамгийн хачирхалтай нь Лу.Болд сайд яагаад Батж.Батбаярын хүүгийн компанитай холбогдоод байдаг юм бол гэдэг нь ч хачирхалтай. Түүнийг Гадаад хэргийн сайд байхад ч Б.Баттулга мөн л яамны өргөтгөл барих тендерийн ажлыг нь авч байсан. Тэгэхээр заавал ч үгүй ямар нэгэн сэжмээр эдгээр нөхөд холбоотой болж харагдаад байгаа юм.
М.Ганшир: “ХӨМОТЭ” компанийн захирал Б.Баттулга данс битүүмжилсэн гэж худлаа яриад байна
Ингээд орон сууцны түр комиссын дарга, бэлтгэл хурандаа М.Ганширээс энэ талаар асуухад “Өнгөрсөн онд 300 айлын орон сууцанд орох хүмүүс хуралдаж түр комисс байгуулсан. Ингэхдээ комиссын дэд даргаар бэлтгэл дэд хурандаа Аманжол, 310 дугаар ангийн Санхүүгийн дарга, дэд хурандаа Хүрэл нарын хүмүүсийг сонгож, ажилуулах болсон. Тухайн үед бид асуудлаа шийдээд дууссан. Одоо бүх асуудал барилгын ажил гүйцэтгэж байгаа “ХӨМОТЭ” компанийн удирдлагуудаас болж ажил саатаад байна. Биднээс шалтгаалж энэ ажил зогссон юм биш.
Энэ компанийн удирдлагуудтай уулзах гэхээр биднээс зугтаад уулзаж өгөхгүй байна. Түүнчлэн өөрсдийнхөө дансыг АТГ битүүмжилсэн гэж яриад байгаа юм. үүнийг нь манай яамны холбогдох албаны хүмүүс АТГ-аас очоод асуухад дансыг нь битүүмжилсэн зүйл огт байхгүй гэсэн хариуг өгсөн. Ингэж л чулуу хөөлгөөд байгаа хүмүүс. Уг нь тэд 2012 онд барилгыг хүлээлгэж өгнө хэмээн хэлж байсан. Бүр тодруулбал, 2011 оны есдүгээр сард 9.9 тэрбум төгрөгийг өөрсдийнхөө данс руу шилжүүлэн авахдаа хугацаандаа хүлээлгэж өгнө гэж хэлж байсан юм шүү дээ.
Ямар ч байсан бид маргааш Ц.Цолмон сайдтай энэ байрны асуудлаар ярилцаж уулзах гээд цаг авсан байгаа юм. Яг үнэндээ “ХӨМОТЭ” компанид 9.9 тэрбум төгрөг өгсөн хүмүүс нь сайд асан Лу.Болд, БХЗГ-ын дарга асан, хурандаа Х.Батсайхан, Санхүүгийн хэлтсийн дарга асан Д.Жаргалсайхан нар л энэ мөнгийг тус компанийн захиралд өгч байсан. Энэ л асуудал одоо хүртэл сунжирч явсаар байна. Хэрвээ “ХӨМОТЭ” компани барилгын дотоод асуудлаа шийдчихвэл байр ашиглалтад ороход бэлэн болоод байгаа шүү дээ.
Гэтэл мөнгө төгрөгөө битүүмжилсэн энэ, тэр гэж худлаа яриад цаг хожоод байна. Түүнээс ирэх зургаадугаар сар гэхэд ашиглалтад орох бүрэн боломж байгаа. Энэ янзаараа бол ашиглалтад орж чадах уу, үгүй юу гэдэг нь бүрхэг болчихоод байна. Ямартай ч энэ байрны тухайд тус компанийн захирлыг шалгаж байгаа асуудал хэрхэн шийдэгдэхийг хэлж мэдэгдэхгүй байна” гэв.
Эцэст нь хэлэхэд төсвийн мөнгө цохиод сурчихсан сайд, дарга нарын балгаас болж байртай болох гэсэн алба хаагчид хохироод зогсохгүй, улсын төсвөөс гарсан 9.9 тэрбум төгрөгийг юунд зарцуулсан нь тодорхойгүй байгаа “ХӨМОТЭ”-гийн захирал Б.Баттулга энэ удаа араасаа сайд асан Лу.Болд, хурандаа Х.Батсайхан, Д.Жаргалсайхан нарыг чирэх нь тодрхой болсон гэж эх сурвалжууд мэдээлж байсан. Бид дараагийн дугаартаа БХЯ-ны харьяа дугаар ангийн захирагч нарын хууль бус үйлдлийн талаар Ц.Цолмон сайдад баримттайгаар хүргэх болно.
Эх сурвалж: 
