Хот хоорондын нийтийн тээвэрт жолоочоор ажиллан, зорчигчиддоо ая дууны эгшгээр бэлэг барьж явдаг байсан гэх МУГЖ дуучин С.Ганзориг өнөөгийн энэ амжилтаа УИХ-ын гишүүн Ж.Энхбаяр нарын хүмүүстэй холбож ярьдаг юм билээ. Энэ ч утгаараа, урлагийн тайзнаа төвөггүйхэн гарч ирсэн тэрбээр сайхан хоолой, хит дуунуудаараа сонсогч түмэндээ хүндлэгдэж, олны танил хүмүүсийг клипэндээ тоглуулдаг “хобби”-той болоод байгаа.
40 гарсан насандаа авааль эхнэр, үр хүүхдүүдээ орхин байж өрх тусгаарласан МУГЖ С.Ганзориг даян аварга А.Сүхбатын том эгчийнх нь охинтой хоёр дахь амьдралаа эхлүүлээд байгаа аж. Хувийн амьдралдаа гарсан энэхүү өөрчлөлтийг тэрбээр ихэд нууцалж явсан ч ойр дотныхон нь таагүй хандаж “Ажил амьдрал нь тогтож, амжилтанд хүрээд ирэхээрээ эхнэрээ голдог моод дэлгэрлээ” хэмээн ярианы завсарт мань эрийг хавчуулах болсноор нууц нь задарчээ.
Дуучин эр хэдийгээр хоёр дахь амьдралаа зохиосон ч гэлээ, үр хүүхдээ урьдын адил харж хандаж яваагаа илэрхийлэн том охин болох бүжигчин Г.Нямааг “Монгол бүсгүй” дууныхаа клипэнд тоглуулсан байна. Мөн энэхүү сонголтынх нь талаар асуусан сэтгүүлчдэд “Хүний амьдралд юу эс тохиолдох билээ дээ. Ямар ч байсан, хоёр дахь амьдралаа зохиосон нь үнэн. Гэхдээ үр хүүхдүүдээ мартаагүй яваа” хэмээн тайлбарлажээ.
Б.Содон
