Нийслэлийн Сонгинохайрхан дүүргийн 9 дүгээр хороонд байрлах Баруун Баян-Уулын гудамжинд суух Э-гийн хашаанд эрэгтэй хүний занданшуулсан шарил байхыг цагдаагийн байгууллагынхан илрүүлээд байгаа билээ. Ингээд шинжлүүлэхээр Шүүхийн шинжилгээний үндэсний хүрээлэнд хүргүүлсэн талаар манай сайт мэдээлж байсан. Энэхүү мэдээлэлтэй холбоотойгоор олон нийт янз бүрийн таамаг дэвшүүлж байгаа бөгөөд олон улсын хэвлэл мэдээллийн агентлагууд ч энэ талаарх мэдээлэлд анхаарлаа хандуулж, мэдээлж байна. Тухайлбал BBC агентлаг “Монголоос олдсон занданшуулсан лам "бүрэн амьсгал хураагаагүй" гэх гарчигтай http://www.bbc.com/news/world-asia-31125338 нийтлэлийг өнгөрсөн лхагва гарагт нийтэлжээ.
Цагдаагийн байгууллагынхан иргэдийн мэдээллийн мөрөөр энэхүү занданшуулсан шарилыг Сонгинохайрхан дүүргээс хурааж авахдаа бурханч лам Г.Пүрэвбатад үзүүлсэн аж. Тэрээр тухайн үед “Хутагт хувилгаан, гэгээнтнийг оршуулах зан үйлийн дагуу занданшуулсан шарил байна. Очир завилгаагаар суулгасан, зүүн мутрыг тэгш атгуулж, баруун мутрыг ном номлохын ерөөлтэйгээр өргүүлсэн, зохих журмын дагуу сайтар занданшуулсан шарил байна. Орон нутгийн сүм хийдийнхэн нутаг нугтаа байгаа тэрхүү шүтээнээ байр савандаа байна уу үгүй юу гээд эргэж тойрч үзэхэд илүүдэхгүй байх. Нууцлаг шүтээнийг нь ховхлоод ирсэн байх вий” хэмээж байсан юм.
Тэгвэл бурханч лам Г.Пүрэвбатаар ахлуулсан ажлын хэсгийнхэн энэхүү занданшуулсан шарилыг ард олноо “Өвгөн Гэсэр лам” хэмээн өргөмжлөгдсөн их хувилгааны шавь Цорж Санжжавынх болохыг тогтоосон байна. Цорж Санжжав нь 200 гаруй жилийн өмнө амьдарч байсан бөгөөд Гэсэр багшаасаа 25 насаар дүү хүн байжээ.
Гэсэр лам болон түүний шавь Цорж Санжжав нарын бунхан Архангай аймгийн Тахир сумын нутагт байрлах Содномдаржаа уулын оройд байдаг байжээ. Нийслэлээс хэн нь үл мэдэгдэх занданшуулсан шарил олдсон даруйд ажлын хэсгийнхэн Архангай аймгийг зорьсон байна. Ингээд бунхан хадгалагдаж буй ууланд очиход Гэсэр ламын шавь Цорж Санжжавын бунхан хөндөгдөж, шарил нь алга болсныг нь тогтоожээ.
Гэсэр лам болон түүний баруун гарын шавь болох Цорж Санжжав нар нь Архангай аймгийн Байцын дуганд ном хурж байсан аж. Гэсэр ламын удмын С.Батчулуун гэдэг хүний хэлснээр 200 орчим жилийн өмнө Гэсэр лам Хөх нуурын дэнд эрэгт амьдарч байсан гэнэ. Жанч халахынхаа өмнө шавь нараа дуудаж Содномдаржаа ууланд минь нутаглуулаарай хэмээж байсан аж. Ингээд бясалгаж байгаад жанч халахад шавь нар нь тэмээгээр Содномдаржаа уулын орой дээр нутаглуулж, тэр үеийн аргаар занданшуулсан гэнэ.
Үргэлжлэлийг ЭНД дарж уншина уу
Эх сурвалж: Eagle.mn
