ХААИС-ийн захирал асан Б.Бямбааг таван жил зургаан сар хорьж шийтгэхээр боллоо. Түүний хэрэг мөрдөн байцаалт, шүүх дээр жил гаруй эргэж буцан шалгагдсаар өчигдөр Дүүргийн эрүүгийн хэргийн 2 дугаар шүүх ийнхүү шийдэв.  Тэрбээр ХААИС-ийнхаа эзэмшлийн газар дээр хувийн компаниудаар орон сууцны барилга бариулж, дундаас нь ашиг хүртэж  байжээ. Ийм бусармаг үйлдэлдээ тус сургуулийн дэд захирал Ц.Амарсайханаар хуурамч тушаал  гаргуулж, ерөнхий нягтлан бодогч Д.Янжмаагаар хуурамч гүйлгээ хийлгүүлж байсан байна. Б.Бямбаа иймэрхүү байдлаар сургуулийнхаа данснаас 800 гаруй сая төгрөг хувьдаа ашиглажээ. “Химон констракшн”, “Ариун гар” зэрэг хэд хэдэн хувийн  компанитай тэр ашиг сонирхолоо нэгтгэн мөнгө завшиж байсан байна. “Химон констракшн” компанийн барьсан орон сууцаас хоёр өрөө байрыг өөрийн жолоочоор ажиллаж байсан Б.Болдбаатарын нэр дээр бүртгүүлсэн байв. Энэ мэтээр Б.Бямбаа өөрийн хар мөрийг  займчуулан баллах, шүүхэд нөлөөлөх оролдлогуудыг удаа дараа хийж байсан тул хууль хяналтынхан сүүлдээ  цагдан хорьж  хэргийг хэлэлцжээ.  Хэргээ урьд нь хэрэгсэхгүй болгуулж хүртэл амжсан байлаа. Гэвч түүнийг албан тушаалаа урвуулан ашигласан, эд хөрөнгө завшсан хэргээр нь тийнхүү шийтгэлээ. Шүүхээс  уг  хэргийн хамтрагч Д.Янжмаад таван жил нэг сар хорих ял оноож, Ц.Амарсайханы хэргийн хөөн хэлэлцэх хугацаа дууссан  тул хэрэгсэхгүй болгожээ.

Б.Баяр

Эх сурвалж: Tumen.mn

Б.Бямбаагийн хэрэгтэй холбоотой баримтуудыг эндээс  уншиж болно: http://manaiklub.com/2013/08/31/%D1%85%D0%B0%D0%B0%D0%B8%D1%81-%D0%B8%D0%B9%D0%BD-%D0%B7%D0%B0%D1%85%D0%B8%D1%80%D0%B0%D0%BB-%D0%B0%D1%81%D0%B0%D0%BD-%D0%B1-%D0%B1%D1%8F%D0%BC%D0%B1%D0%B0%D0%B0%D0%B3%D0%B8%D0%B9%D0%BD-%D0%BB%D1%83/

Б.Баяр

Эх сурвалж: Tumen.mn