Украины Ерөнхийлөгч асан В.Янукович ард түмнийхээ аж амьдралыг хөнгөлөхийн тулд боломж гармагц Украинд эргэн очихоо амлажээ. Тэрбээр Оросын төв телевизийн “Первый канал”-д өгсөн ярилцлагадаа энэ тухайгаа мэдэгдсэн байна. В.Янукович эх орондоо эргэн очиж, эсэргүүцлийн хөдөлгөөнийг тэргүүлэх тухай олон удаа бодсон боловч хамтран зүтгэгчид нь үүний эсрэг байсныг өгүүлсэн аж. Үүнээс гадна түүнийг эх орондоо эргэн очвол амь насыг нь хороохын тулд эсрэг тал бүхнийг хийх нь тодорхой гэдгийг хэлдэг байжээ. Украины Ерөнхийлөгч асан В.Янукович нэг жилийн өмнө Киев хот дахь Майданы талбайд болсон мөргөлдөөний үеэр Оросын нутаг руу оргон зайлсан. Үүний дараа түүнийг эсэргүүцэгчид тус улсын парламент буюу Дээд Радыг тэргүүлж, Ерөнхийлөгчийн ээлжит бус сонгууль явуулснаар П.Порошенко Төрийн тэргүүнээр тодорчээ.

Эх сурвалж: Unen.mn