Эрчим хүчний салбарын үйлдвэр, компаниудын гүйцэтгэх захирлуудын өргөтгөсөн шуурхай зөвлөгөөн өнгөрсөн сарын сүүлээр болсон юм. Уг зөвлөгөөн дээр 2014 оны эрчим хүчний салбарын байдлыг ерөнхийлөн хэлэлцэв.
Монгол Улсын эрчим хүчний нэгдсэн системийн хэмжээнд 2014 онд 5476.7 сая кВт.цаг цахилгаан эрчим хүч, 7075.5 мян.Гкал дулааны эрчим хүч үйлдвэрлэсэн байна. Эрчим хүчний үйлдвэрлэлийг 2013 онтой харьцуулахад цахилгаан эрчим хүч 6.7 хувиар, дулааны эрчим хүчний үйлдвэрлэл 4.3 хувиар тус тус өссөн байна.
2014 онд нийтдээ ОХУ-аас 389.98 сая кВт.цаг, БНХАУ-аас 999.26 сая кВт.цаг цахилгаан эрчим хүч импортоор авсан нь өмнөх онтой харьцуулахад 208.06 сая кВт.цагаар буюу 17.6 хувиар өссөн байна. 2014 оны байдлаар Монгол Улс нь ОХУ-аас 7 чиглэлээр БНХАУ-аас 11 чиглэлээр тус тус цахилгаан эрчим хүч худалдан авсан байна.
Монгол Улс 2014 онд нийтдээ 6897.4 сая кВт.цаг цахилгаан эрчим хүч хэрэглэсэн бөгөөд нийт эрчим хүчний хэрэглээний 76.5 хувийг ДЦС-ууд, 2.8 хувийг сэргээгдэх эрчим хүчний эх үүсвэрүүд, 20.1 хувийг импортын эрчим хүчээр хангажээ.
Өнөөдрийн байдлаар эрчим хүчний салбарын 21 үйлдвэр компанид нийтдээ 10340 хүн ажиллалаг аж. Үүний хамгийн олон хүнтэй нь 1728 ажиллагсадтай УБЦТС компани тэргүүлж байна. Өнгөрсөн онд эрчим хүчний салбарын 21 үйлдвэр компаниуд нийтдээ 30.7 тэрбум төгрөгийн алдагдалтай ажилласан нь өмнөх онуудтай харьцуулахад буурсан үзүүлэлт юм.
2014 онд эрчим хүчний салбарын хэмжээнд ДЦС-3-ын хүчин чадлыг 50 МВт-аар, ДЦС-4-ын хүчин чадлыг 123 МВт-аар тус тус өргөтгөх, Амгалан ДС-ыг барих, Увс, Ховд, Хөвсгөл аймгийн төвд ДС, дулааны шугам сүлжээ барих зэрэг томоохон бүтээн байгуулалтын ажлууд хийгдсэн.
2015-2016 оны өвөлжилтийн бэлтгэл хангах ажлын хүрээнд эрчим хүчний салбарын 21 үйлдвэр компани нийт дүнгээрээ 86.3 төгрөг зарцуулахаар төлөвлөж байна. Эх үүсвэрүүдийн хүчин чадлыг нэмэгдүүлэх, найдвартай ажиллагааг хангах хүрээнд ДЦС-3-ын 250 МВт-ын төслийг ажлыг эхлүүлэх, Дархан ДЦС-ын 35 МВт-ын өргөтгөл, Эрдэнэт, Дорнодын ДЦС-ын өргөтгөлийг эхлүүлэх ажил хийгдэх юм. Мөн Амгалан ДС-ын угсралтыг бүрэн дуусгаж, туршилт тохируулгын ажлыг хийж, ажилд залгахаар төлөвлөжээ.
Баавар
