Та өдөр бүр савласан цэвэр ус хэрэглэхдээ бөөн нян залгиж байна гээд төсөөлөөд үз дээ. Огидос үрч бөөлжих байх. Эсвэл хэнэггүй Монгол зандаа хөтлөгдөн чимээгүй өнгөрч мэднэ. Гэхдээ л эвгүй дээ.

Бидний өдөр тутам хэрэглэж буй савласан усыг шинжилж үзэхэд  нянгийн бохиролттой гарчээ.  Энэ  тун ноцтой мэдээ. МЕХГ-аас савласан цэвэр ус үйлдвэрлэдэг нийт үйлдвэрийн 80 гаруй хувьд буюу 54 үйлдвэрийг шалгалтандаа хамруулжээ. Шалгалтаар стандартын шаардлага хангаагүй байранд үйлдвэрлэл явуулдаг  газрууд ч цөөнгүй таарчээ.  Мөн тэдгээр үйлдвэрүүдийн 30 орчим хувь нь зориулалтын тоног төхөөрөмжгүй байсан байна. Шинжилгээний дүнгээр савласан  усных нь 43 хувьд нянгийн бохирдол илэрчээ. Зарим  нь усаа задгай байдалд хадгалдгаас бохирдол үүсдэг аж. Иймээс нийслэлийн хэмжээнд одоогоор 2 аж ахуйн нэгжийн үйл ажиллагааг зогсоогоод байна. Түүнчлэн, зөрчлийг арилгуулж, зарим аж ахуйд торгууль оногдуулжээ.

Б.Баяр

Эх сурвалж: Tumen.mn