“Гал үндэстэн” холбоо, цахим сүлжээний “ДМ” нэгдэл, Хамаг Монгол төслийнхөн хамтран мэдээлэл хийв. Тэд “Саусгоби сэндс” компанийн экс удирдлагуудад Ерөнхийлөгч Ц.Элбэгдорж уучлалт үзүүлж, ялаас чөлөөлснийг эсэргүүцлээ. Юун түрүүд тэд Ж.Капла нарын гадаадын иргэд ял завшиж байна гэлээ. 35 тэрбум төгрөгийн татвараа нуусан хэргийг Ерөнхийлөгч уучилсан нь эх орноо, хуулиа, төр засгаа үнэ цэнгүй болгосон болчимгүй явдал гэж тэд үзжээ. Гал үндэстэн холбооны Ц.Энхбаяр “Бид өнгөрсөн жилүүдэд Сентерра гоулд, Бороо гоулд зэрэг гаднын компаниуд манай орны байгалийн тэнцвэрт байдлыг алдагдуулан алт, бусад үнэт металиудыг татваргүйгээр шахуу аваад гарсныг илчилж, хатуу эсэргүүцэж байлаа. Бүр буу шийдэмдээ тулж байсан. Төр засгийн зүгээс байгаль сүйтгэгчдэд хяналтаа маш муу тавьж байсан. Гадаадын хүмүүсийг ялаас чөлөөлж болдог юм бол эх орныхоо байгаль экологийн төлөө үгээ хэлж тэмцсэнээсээ болоод ял эдэлж байгаа Ц.Мөнхбаярыг ялаас чөлөөлөх хэрэгтэй. Ер нь бид төр засагт итгэл үзүүлэх эсэхийг нийт ард түмнээсээ асуух цаг боллоо. Хэдий болтол ингэж явах билээ” гэв.
Мөн тус холбооныхон Ноён уулыг эртний Хүн гүрний нэн ховор түүхэн дурсгалт булш бунхан бүхийн онцгой газар, тэнд уурхай ажиллуулж болохгүй гэж байв. “Урт” нэртэй хуулийг дагаж мөрдөх журмын тухай хууль, бусад хууль тогтоомжуудыг битүүний өдөр хулгайн замаар баталсанд бас бухимдаж буй аж.
Гэхдээ дан ганц Ноён уулаар тэмцэлээ хязгаарлахгүй гэдгийг энэ үеэр Хамаг Монгол төслийн удирдагч С.Жавхлан онцолж байлаа. Тэрбээр, энэ сарын 7-ны өдөр Чингисийн талбайгаас эхлүүлэх ард түмний санал асуулгыг хэвлэл мэдээллийн хэрэгслүүд, сэтгүүлчид идэвхтэй дэмжиж ажиллахыг уриалсан юм. Түүнчлэн С.Жавхлан т гурван өндөрлөг буюу Ерөнхийлөгч, УИХ-ын дарга, Ерөнхий сайд нартай нийгэмд шударга ёсыг бэхжүүлэх, байгаль орчныг хамгаалах зэрэг асуудлаар халз мэтгэлцээн хийнэ гэв.
Ж.Капла нарын гадаад иргэдийг ялаас чөлөөлж уучилсан бол монголчуудынхаа банкны зээлийн өрийг төлүүлэхгүй байх хэрэгтэй гэдгийг мөн тэд сануулж, “Өнөөдөр монголчуудын ихэнх нь зээлийн өрөнд баригдаж, татварын нүсэр ачаалал дор аж төрж байгаа бөгөөд тэднийг Ж.Капла нар шиг яагаад уучилж болохгүй байхав” хэмээн харьцуулан тайлбарлаж байлаа.
“ДМ” нэгдэл нь өөртөө 68 гаруй иргэдийг нэгтгэсэн цахим ертөнцийн томоохон сүлжээ болсон байна. Тус нэгдэлийнхэн гадаадад амьдарч байгаа монголчуудаа энэхүү санал асуулгадаа өргөнөөр оролцуулах ажээ.
Гал үндэстэн холбооны Ц.Мөнхбаяр одоо Хар хорингийн шоронд байгаа. Харин түүнтэй хамт ял соссон Болдбаатар нь Амгалангийн хорих ангид хирогдож байгаа юм байна. Ц.Мөнхбаярын хувьд үе үе цусны даралт нь исэхдэг болсон гэнэ. Харин “Болдбаатарын зүрхний үйл ажиллагаа сүүлийн үед эрс муудсан” гэж энэ үеэр Ц.Энхбаяр гуай хэлж байлаа.
Б.Отгонбаяр
Эх сурвалж: Tumen.mn
