Цагдаагийн газраас мал хулгайлах гэмт хэрэгтэй тэмцэх чиглэлээр зохион байгуулсан арга хэмжээний хүрээнд ажилласан алба хаагчид Мөрөн, Жаргалтхаан, Өмнөдэлгэр, Цэнхэрмандал сумын нутаг дэвсгэрээс 2009 оны 11 дүгээр сараас 2015 оны 01 дүгээр сар хүртэлх хугацаанд удаа дараагийн үйлдлээр иргэдийн олон тооны бод малыг хулгайлсан бүлэг этгээдэд холбогдох гэмт хэргийг илрүүлэн шалгаж байна. Шалгалтын явцад Мөрөн сумын харъяат Г, М, Б, Өмнөдэлгэр сумын харъяат Г, С, Н, Б, Цэнхэрмандал сумын харъяат Ш нар үгсэн тохиролцож бүлэглэн өөрсдийн эзэмшлийн 09-47 УНГ улсын дугаартай ногоон өнгийн Истана, 52-85 ХЭА улсын дугаартай цагаан өнгийн Бонго жи-2, 30-10 ХЭҮ улсын дугаартай хар ногоон өнгийн Делика, 27-56 УНВ улсын дугаартай цэнхэр өнгийн Бонго маркын автомашинуудыг ашиглан Мөрөн сумын нутаг дэвсгэрээс 4, Өмнөдэлгэр сумын нутаг дэвсгэрээс 4, Жаргалтхаан сумын нутаг дэвсгэрээс 2, Цэнхэрмандал сумын нутаг дэвсгэрээс 1, нийт 11 удаагийн үйлдлээр иргэдийн 43 тооны адуу, 13 тооны үхрийг хулгайлж иргэдэд 59.0 сая төгрөгийн хохирол учруулсныг тогтоолоо. Дээрх этгээдүүд мөнгөний хэрэгцээ бий болох үедээ өөр хоорондоо утсаар холбогдож хоног тохирч уулзан, нэг сумын нутаг дэвсгэрээс хулгайлсан малаа тээврийн хэрэгсэлд ачин сум дамжуулан зөөж, “ченж” нэртэй хүмүүст худалдан борлуулдаг байсныг нотолсон байна. Үүнтэй холбоотойгоор гэмт хэрэг үйлдэхдээ ашигласан тээврийн хэрэгслүүдийг хуулийн дагуу хураан авч битүүмжлэн, ашиг хонжоо харан хулгайн мал, махыг хямд үнээр авч, хулгайчийг өөгшүүлэн үгсэн хуйвалдаж байгаа, өөрсдийгөө “ченж” гэж нэрлэсэн гэмт хэргийн хамтран оролцогчдыг онцлон шалгах ажлыг эрчимжүүлж эхэллээ. Иймд малчин та бүхэн мал сүргээ байнгын хараа хяналтай, хариулга маллагаатай байлгаж, Аймгийн Иргэдийн Төлөөлөгчдийн Хурлын Тэргүүлэгчдийн 41 дүгээр тогтоолоор батлагдсан “Гэмт хэргийн тухай мэдээллийг төлбөртэй авах журам”-ын дагуу иргэнийхээ журамт үүргээ биелүүлж гэмт хэрэг, зөрчлийг таслан зогсоох, илрүүлэхэд ач холбогдолтой мэдээлэл өгч хамтран ажилласан тохиолдолд мэдээллийн нууцлалыг чанд хадгалж, 2.0 сая хүртэл төгрөгөөр шагнаж урамшуулахыг Цагдаагийн газраас анхааруулж байна.

Эх сурвалж: Zaluu.com