Нийслэлийн хэмжээнд энэ онд нэлээд хэдэн газрыг хувьчлахаар яригдаж байна. Өмчийн харилцааны газраас нь “Гэрлэх ёслолын ордон” зэрэг 19 байгууллагыг хувьчлах саналыг удахгүй Нийслэлийн иргэдийн төлөөлөгчдийн хуралд оруулахаар  болжээ.  Тэдгээр хувьчлах газруудын тоонд мөн “Усан спорт сургалтын төв” багтаж байна.

Гэрлэх ёслолын ордонг ашиггүй ажилласан гэх шалтгаанаар хувьчлах жагсаалтанд оруулсанд тэндэхийн зарим ажилтнууд гайхан, эсэргүүцэж  буй ажээ. Тус ордон өнгөрсөн онд 400 гаруй сая төгрөгийн ашигтай ажилласан гэж байна. Харин жил бүрийн эхний 1-3 сард л бага зэрэг алдагдалтай ажилладаг аж. Учир нь энэ үеэр гэрлэх хосуудын захиалга харьцангуй цөөн байдаг гэнэ.  Зун, намрын турш ашгаа нөхөөд олоод авдаг юм байна. Гэтэл ашиггүй тул хувьчиллаа гэх нь учир дутагдалтай ажээ.

“Усан спорт сургалтын төв”-ийн хувьд  бол нэлээд  алдагдал үүрч байжээ. Энд шалтгаан их. Ядаж л байр нь засвар муу хийгдсэн. Гэхдээ сүүлийн үед ашигтай ажиллах боломж бас бүрдэж байгаа юм байна.

Б.Баяр

Эх сурвалж: Tumen.mn