Орхон аймгийн Баян-Өндөр цогцолбор сургуулийн 600 гаруй сурагчид нэгдэж гарын үсэг зурж TV9 телевизийн “Монгол коммент” нэвтрүүлэгт хандаж захиа бичжээ. Тус сургуулийн сурагчид эрүүл аюулгүй орчинд сурч боловсрох хүсэлтэй байгаа гэдгээ илэрхийлсэн байна.

 

Учир нь сургуулийн ойр орчимд гэр оронгүй хүмүүс цуглаж архи ууж, хүүхдүүдийг айлгаж, архины шил лаазаа ихээр хаядаг байна.Мөн сургуулийн хажууд замын эсрэг талд шил лааз авах цэг сургуулиас 20 метр зайд байдаг, сургуулиас 40 метрийн зайд “Onyx” паб, 45 метрийн зайд “Loft” диско клуб гэх мэт байгууллагууд үйл ажиллагаа явуулж байгаа юм.

 

Хуульд зааснаар сургууль цэцэрлэгээс 500 метрийн зайд архи тамхи худалдан борлуулахыг хориглодог. Гэтэл энэ талаар бүх шатны байгууллагад хандаж олон удаа хөөцөлдөж байгаа болов ч үр дүнд хүрэхгүй байгаа талаар тус сургуулийн нийгмийн ажилтан Г.Дөлгөөн хэлж байгаа юм.