Орос орон даяар Крым, Севастополь эргэн нэгдсэний 1 жилийн ойг тэмдэглэлээ. Энэхүү арга хэмжээнд 700 мянган хүн оролцсон байна.

Зөвхөн Москва хотод 110 мянган хүн баярт хүрэлцэн ирсний дотор Оросын Ерөнхийлөгч Владимир Путин ч байв.

Путин үг хэлсэн төдийгүй Оросын сүлд дууллыг цугласан олонтой хамтран дуулжээ. Владимир Путин "Орос улс гаднаас зориудаар өдөөн хатгаж, элдэв саад тотгор үүсгэж байгааг даван туулж чадна. Ер нь Орост ийм юм хийгээд дэмий.  Крым, Севастополь Оростой нэгдсэн явдал нь зүгээр нэг стратегийн ач холбогдолтой газар нутаг биш, манайд хангалттай газар нутаг бий. Энд сая сая оросуудын тухай, түүхэн эх сурвалж, оюуны ба төр засаглалын эх үүсвэр, та биднийг нэгдмэл ард түмэн болгосон зүйлийн тухай яригдаж байна" гэж мэдэгдлээ.

"Оросууд ба украинчууд бол нэг ард түмэн. Хэт үндсэрхэг үзэл үргэлж аюултай, хортой байдаг. Украины ард түмэн улс орноо ийм байдалд оруулсан хүмүүсийн үйл ажиллагаанд бодит үнэлгээ өгөх цаг ирнэ гэдэгт би итгэлтэй байна. Харин Орос өөрийн зүгээс Украин энэ хүнд үеийг аль болох хурдан даван туулж, олон улсын хэвийн харилцааг сэргээхийн төлөө чадах бүхнээ хийнэ" гэж Оросын Ерөнхийлөгч ярилаа. .

Харин крымчууд энэ талаар "Дайн дажингүй, энх тайван амьдарч байгаад баярлалаа" гэж хэлж байлаа.

Парламентад суудалтай бүх намын тэргүүнүүд оролцсон. "Нэгдсэн Орос" фракцийн Владимир Васильев "Хориг арга хэмжээгээр Оросын нийгмийг хагалан бутаргахыг хүсэгсэд харин ч урьд хожид байгаагүйгээр оросуудыг нэгдэн нягтрууллаа" гэсэн бол Коммунист намын дарга Геннадий Зюганов "Крымын үйл явдал Оросыг том дайнаас аварлаа" гэжээ.

Оросын Либерал ардчилсан намын тэргүүн Владимир Жириновский "XXI зуун бол Орос, Крымын нэгдийн зуун боллоо. Крымын оршин суугчид бол манай үеийн баатрууд" хэмээжээ.

"Шөнийн чоно" байкеруудын лидер Александр Залдостанов (Мэс засалч) "Крымыг нэгтгэсэн явдал бол Оросыг хоёр дахь удаагаа адисалсантай адил. Нэг Владимир манай Оросыг загалмайлсан бол нөгөө Владимир адис хүртсэн эх нутаг, өлгийг та бидэнд буцааж авч ирлээ" хэмээн мэдэгдэв.

Эх сурвалж: www.mnews.mn