Монгол цэргийн өдөр, Зэвсэгт хүчний 94 жилийн ойн баярыг тохиолдуулан Хууль зүйн байнгын хороо, Эмэгтэй гишүүдийн зүгээс армид алба хааж буй эмэгтэйчүүдийн төлөөллийг өчигдөр Төрийн ордонд хүлээн авч, баяр хүргэлээ. Уулзалтад БХЯ-ны Төрийн нарийн бичгийн дарга, хошууч генерал З.Болдбаатар, тус яамны Стратегийн бодлого, төлөвлөлтийн газрын дарга, хурандаа Г.Сайханбаяр нар болон Хойд Судан, Өмнөд Судан, Сьерра-Леон, Афганистан дахь энхийг дэмжих ажиллагаанд удирдах албан тушаал хашиж байсан таван эмэгтэй болон БХЯ-ны Гадаад хамтын ажиллаганы Европын орнуудын асуудал хариуцсан мэргэжилтэн, дэд хурандаа О.Ариунаа, ЗХЖШ-ын Ажиллагааны удирдлагын газрын Энхийг дэмжих ажиллагааны хэлтсийн ахлах мэргэжилтэн, дэд хурандаа Н.Нямжаргал, БХХСАХНЭ-ийн Дотрын нэгдүгээр тасгийн эрхлэгч, дэд хурандаа П.Самбуужанцан нар оролцов. Энэхүү уулзалтын үеэр БХЯ-ны Төрийн нарийн бичгийн дарга, хошууч генерал З.Болдбаатар хэлсэн үгэндээ улс орноо батлан хамгаалах зэвсэгт хүчний салбарт үүрэг гүйцэтгэж байгаа, олон улсын энхийг сахиулах үйлсэд удирдах албан тушаал хашиж байсан эмэгтэйчүүдийг УИХ, түүний байнгын хороо, эмэгтэй гишүүд хүлээн авч хүндэтгэл үзүүлж байгаад талархаж буйгаа илэрхийлээд “Монгол Улс 2002 оноос хойш НҮБ-ын энхийг дэмжих ажиллагаанд оролцож байгаа. Манай зэвсэгт хүчний бие бүрэлдэхүүнээс олон улсын энхийг дэмжих ажиллаганд нийт 11 мянган хүн оролцсоны 2.9 хувь буюу 341 нь эмэгтэйчүүд байдаг. Манай эмэгтэй офицеруудын оролцоо тооны хувьд бага ч чанарын хувьд өндөр, НҮБ-ын төв штабын Ажиллагаануудын дарга нараар ажилладаг, 2-3 гадаад хэлтэй хүмүүс байдаг. Энэ жилийн хувьд энхийг дэмжих үйлсэд манай улсаас 1100-гаад цэргийн албан хаагч оролцож байгаагийн 72 нь эмэгтэйчүүд байгаа” гэсэн юм.
Эх сурвалж: Unen.mn
