Төв аймгийн Цээл сумын иргэд Хятадын хөрөнгө  оруулалттай “Еос” компанийн  хууль бус үйл ажиллагааг эсэргүүцэн тэмцэж буй талаар манай сайт мэдээлж байсан билээ. Тус компани Цээл сумын Лүн толгой хэмээх газарт 3000 га газарт хайгуулын тусгай зөвшөөрөлтэй гэх бөгөөд тэнд алт олборлохоор  улайран зүтгэжээ. Мөн “Еос” нь Цээлийн нутагт өөр хоёр  талбайд  тусгай зөвшөөрөлтэй гэж байгаа. Лүн толгойн орчимд түүхийн үнэт өв цөөнгүй. Бурхан багшийн хөргийг хадан дээр сийлсэн төдийгүй эртний Хүннүгийн үеийн сүг зургууд олон байдаг байна. Түүнчлэн энэ нутгийнхан үе үеийн талийгаачдынхаа шарилыг  Лүн толгойн  хажуухан талд хадгалсаар иржээ. Гэтэл “Еос” компани бичиг баримтаа хуурамчаар үйлдэн тусгай зөвшөөрлөө сунгуулсан нь саяхан болсон  иргэний хэргийн давж заалдах шатны шүүх хурлын үеэр  ил болсон байна. Тиймээс шүүх уг хэргийг дахин шалгуулахаар буцаажээ.

Б.Баяр

Эх сурвалж: Tumen.mn