МУГЖ С.Жавхлан Төрийн гурван өндөрлөгийг мэтгэлзээнд дуудаад хэд хонож буй. Тэрбээр олон нийтээс ирсэн асуултыг Ерөнхийлөгч, Ерөнхий сайд, УИХ-ын даргад хүргэх зорилготой. Хэд хоногийн өмнө МҮОНРТ-д Төрийн гурван өндөрлөг болоод УИХ-ын гишүүдийг мэтгэлзээнд дуудсан боловч хэн ч ирээгүй. Мөн тус телевизийн зүгээс нэвтрүүлгийн цагийг хойшлуулсан нь нэлээн маргаан үүсгэсэн юм. Энэ талаар С.Жавхлан хэвлэлийн хурал хийж, тус телевизийн захирал Оюундарийг огцруулах ёстой хэмээн мэдэгдээд байсан юм. Тэгвэл С.Жавхлан өчигдөр МҮОНРТ-ийн “Үзэл бодол” шууд нэвтрүүлэгт орлоо. Тэрбээр “Төрийн өндөрлөгүүд ард түмнийхээ үгийг сонсох ёстой. Ард түмний амьдрал хэцүү байна. Энэ бүгдийг төрийн тэргүүнүүд анхааралдаа авах ёстой” гэж байв. Түүнчлэн ярилцлагын төгсгөлд Монгол Улсын Ерөнхийлөгчийг дахин халз ярилцлагад урьж байгаагаа дуулгасан.
