Ч.Сайханбилэгийн тэргүүлсэн танхим төрийн албан хаагчдад хамгийн их халгаатай Засгийн газраар тодроод байна. Нэг ёсондоо улс орны эдийн засаг хямралтай байгаагийн горыг тэдэнд үүрүүлж байгаа гэхэд нэг их буруудахгүй. Гэхдээ мэдээж энэ үг хэсэг хүнд буюу цомхотголд өртсөн эсвэл цалингаа хасуулсанд нь хамаатай. Ч.Сайханбилэг“Шийдлийн” Засгийн газрыг тэргүүлэх болсноор хамгийн түрүүнд төрийн албан хаагчдын орон тоог15 хувиар цомхотгох шийдвэр гаргасан. Түүнчлэн төсвөөс мөнгө сааж, үр ашиггүй ажилладаг тусгай сангуудыг татан буулгахаар болсон юм. Тэгвэл гүйцэтгэх засаглалын тэргүүний гаргасан эдгээр шийдвэрийн биелэлт ямар байгааг нэхэн сурвалжиллаа. Засгийн газрын тэргүүнийхээ даалгаврыг төрийн албад хэрхэн биелүүлж байна вэ.
ТУСГАЙ САНГУУДЫГ НЭГТГЭСНЭЭР10 ГАРУЙ ТЭРБУМЫГ ТӨСӨВТ ТӨВЛӨРҮҮЛНЭ
Ерөнхий сайдаар томилогдонгуутаа эдийн засгийг онилсон Ч.Сайханбилэг “Нийтэд таалагдахгүй шийдвэр олныг гаргах болно” гэсэн нь түүнийг хүссэн хүсээгүй олны анхааралд хүргэсэн. Харин дараахан нь тэрбээр “Хүүхэд, эхчүүдийн мөнгийг хасна” гэсэн нь жинхэнэ дуулиан дэгдээж, үнэхээр олны дургүйг хүргэсэн. Манай улсад төрийн халамжаар амьдардаг хүн цөөнгүй байдгаас Засгийн газрын тэргүүний энэхүү шийдвэрийг маш хүчтэй эсэргүүцсэн учраас аргагүйн эрхэнд буцаасан байдаг. Харин тэрбээр энэ шийдвэрийн дараагаар нийтэд таалагдах хэд хэдэн шийдвэрийг гаргасан нь төрийн албан хаагчдын орон тоог бууруулахаас гадна тусгай сангуудыг татан буулгаж нэгтгэх, төрийн албаныхан өдөр тутмынхаа хэрэгцээнд шатахуун их зарцуулдаг жийп автомашин унахыг болиулах шийдвэр байлаа. Өнөөдрийн байдлаар гүйцэтгэх засаглалын тэргүүн ийм шийдвэр гарган хэрэгжүүлэх даалгавар өгөөд 2-3 сарын хугацааг үдэж буй. Энэ хугацаанд даалгаврын биелэлт ямар байгааг харвал яам, агентлагуудын жийп автомашиныг хураах ажил ахицтай яваа бөгөөд өнөөдрийн байдлаар 40-өөд машиныг Засгийн газрын автобаазад төвлөрүүлээд байгаа аж. Харин тусгай сангуудын хувьд нэгтгэж төсвийг нь танах ажил дуусч, ажил нь жигдэрсэн гэдгийг Сангийн яамны Төрийн нарийн бичгийн дарга Х.Ганцогт хэлж байна. Өмнө нь жилдээ 2.5 их наяд төгрөг зарцуулдаг байсан Монгол Улсын Засгийн газрын тусгай сангуудын зардлыг танах, заримыг нь татан буулгах болон нэгтгэснээр арав гаруй тэрбум төгрөгийн хэмнэлт хийжээ. Тодруулбал, БСШУЯ-ны харьяа Соёл ур лагийг хөгжүүлэх сан, Байгаль хамгаалах сан, Монгол судлалын сангийн ажлын албыг татан буулгасан байна. Харин улсын нэр дээр байдаг ч үйл ажиллагаа явуулдаггүй тусгай долоон ч сан байсан байна. Тухайлбал, Цагдаагийн хөгжлийн, Орон сууц хөгжүүлэх, Олон улсын гэрээний дагуу байгуулсан сан, Инновацын, Орон сууц хөгжүүлэх, Сэргээгдэх эрчим хүчний, Газрын тосны салбарыг хөгжүүлэх, Хөрөнгө оруулалт хөгжлийн сан зэрэг нь үйл ажиллагаа явуулдаггүй байжээ. Сангийн үйл ажиллагааг хэрхсэн талаар Сангийн яамны Төрийн нарийн бичгийн дарга Х.Ганцогтоос тодруулахад, “Одоогоор 30 гаруй сан үйл ажиллагаа явуулдгаас арав орчим нь улсын төсвөөс санхүүждэг. Эдгээрийг татан буулгаж буюу нэгтгэснээр арав орчим тэрбум төгрөгийн хэмнэлтийг төвлөрүүлэхээр энэ оны төсөвт тусгасан. Ингэснээр 20 орчим орон тоо буурч байгаа. Өөрөөр хэлбэл, сангуудыг нэгтгэхгүй. Татан буулгаад тухайн холбогдох яаманд ажлыг нь шилжүүлж байгаа гэсэн үг” гэлээ. Ийнхүү тусгай сангуудын үйл ажиллагааг өөрчилснөөр арав орчим тэрбум төгрөгийн хэмнэлт Засгийн газраас хийгээд байна. Өнөөдрийн байдлаар энэ ажил бүрэн дууссан бөгөөд тусгай сангуудын шинэчилсэн үйл ажиллагаа хэдийнэ жигдэрчээ.
500 ОРЧИМ ТӨРИЙН АЛБАН ХААГЧИЙГ ЦОМХОТГОЖЭЭ
Засгийн газрын тэргүүний гаргасан бас нэг шийдвэр нь төрийн албан хаагчдын орон тоог 15 хувиар цомхотгох байсан. “Шинэчлэлийн” гэгдэх Засгийн газрын үед төрийн алба төрлийнх алба болж данхайсныг хэн хүнгүй мэднэ. Тийм ч учраас энэ шийдвэрийг “Өмнөх Засгийнхаа хийсэн буруу ажлыг залруулсан зөв зүйтай алхам боллоо” хэмээн олон нийт таатай хүлээн авсан. Ганцхан жишээ дурдахад, 2012 онд 147 мянган төрийн албан хаагч байсан бол өнгөрсөн буюу 2014 онд 180200 болтлоо өссөн байдаг. Харин 2015 онд “Шийдлийн” Засгийн газар энэ тоог 15 хувиар буюу 1669 төрийн албан хаагчийг цомхотгон, чадварлаг төрийн албатай болох тавьсан юм. Харин энэ шийдвэрийн хэрэгжилт ямар байгааг албаныхнаас тодруулахад, “Зөвхан яам, агент лагийн орон тоог 15 хувиар цомхотгох шийдвэрийг өнгөрсөн оны арванхоёрдугаар сард Засгийн газраас гаргасан. Энэ хүрээнд өнөөдрийн байдлаар 500 орчим хүнийг цомхотгоод байна” гэлээ. Ямартай ч яам, агентлагууд ийнхүү орон тоогоо цөөлснөөр багагүй хэмжээний хэмнэлтийг хийгээд байгаа аж.
Эх сурвалж: Unen.mn
