Жудо бөхийн ОУХМ, Залуучуудын Азийн аварга Г.Хэрлэнтэй ярилцлаа. Өдгөө 23 настай тэрээр Монгол Улсаа төлөөлж оролцсон хэд хэдэн тэмцээнд өндөр амжилт үзүүлээд байгаа юм. Түүнийг Азийн аварга шалгаруулах тэмцээнд оролцох гээд бэлтгэл сургуулилтаа хийж байх үеэр нь уулзаж ярилцлаа.
-Жудо бөхийн спортоор хэдэн жил хичээллэж байна вэ. Энэ спорт таны сэтгэлийг юугаараа татав?
-Дархан уул аймгийн Биеийн тамир спортын газраас спортын гараагаа эхэлж 2004 оноос жудо бөхөөр тууштай хичээллэж байна. Багаасаа л барилдаж ноцолдож, дээл хувцсаа уралцаж явах дуртай хүүхэд байлаа. Бас манай ах самбо бөхийн ОУХМ Занданхүү гэж хүн бий. Тиймээс ахын маань спортыг дээдэлдэг чанар ч нөлөөлсөн байж болох юм.
-Одоо та үндэсний шигшээ багт харъалагдаж байна. Хэн багшийн удирдлаган дор бэлтгэл сургуулилтаа хийж байна вэ?
-Анхны багш болох Ганболд багш маань маань хөдөө суманд байгаа. Үүний дараа Дархан спорт хорооны жудо бөхийн дасгалжуулагч Батбилэг багшийн удирдлаган дор хичээллэж байгаад 2008 оноос жудо бөхийн үндэсний шигшээ багт харьяалагдан бэлтгэл сургууилтаа хийж байна.
-Энэ хугацаанд ямар амжилтуудыг үзүүлэв?
-Би 66 кг-д барилддаг. 2007 онд Өсвөрийн Ази тивийн аварга, 2012 онд Хятад улсад болсон Чиндаогийн Гранпри тэмцээнээс алт, 2013 онд Америкт болсон Гранпри тэмцээнд алт, Монголд болсон Гранпри тэмцээнээс хүрэл медаль болон Грандслам тэмцээнүүдээс алт, мөнгө, хүрэл медалиудыг хүртэж байлаа. Одоо Азийн аварга шалгаруулах тэмцээнд оролцох гээд бэлтгэл сургуулилтаа базааж байна.
-Тамирчин хүн ялалт ялагдал хоёрт бэлэн байх ёстой. Гэсэн ч ялалтандаа бахархаж, ялагдалдаа гэмших үе олон байгаа даа?
-Мэдээж байнга ялна гэж байхгүй шүү дээ. Тиймээс ялагдсан үедээ сэтгэл зүйн бэлэн байдалд байх ёстой. Өөртөө дүгнэлт хийж энэ удаад ямар тактикийн алдаа гаргав, цаашид юун дээр анхаарах ёстойв гэдгээ бодолцоно. Дахин тэрхүү алдаагаа давтахгүйн тулд багш нартайгаа зөвлөлдөөд дараагийн тэмцээндээ амжилт гаргахын төлөө хичээнэ шүү дээ.
-Дэвжээнд гарахын өмнө чухам юу бодогддог вэ?
-Дэвжээн дээр гарсан тохиолдолд учраа бөхөө ялахын төлөө л тэмцэнэ. Өөр зүйл бодох ч боломж гардаггүй. Шулуухан хэлэхэд даруулаад хэвтэж байхад татаад босгох хүн байхгүй учраас өрсөлдөгчөө л ялах нь чухал шүү дээ.
-Олон тэмцээн дундаас тань хамгийн хүнд учраа хаанахын хэн байв?
- Жудо бөх дэлхийд өндөр хөгжсөн. Тийм учраас өрсөлдөгч бүхэн л чанга байдаг даа. Түүнээс энэ нь илүү, эсвэл тэр нь бүр илүү гэсэн ойлголт байхгүй. Магадгүй тухайн тамирчныг би энэ их эвгүй дээ гэж бодож байхад тэр ч бас мөн адил бодож байж болно шүү дээ. Тийм учраас өөрийгөө өндөрт огт тавьж болохгүй.
-Тамирчдаасаа хэнээс нь илүү үлгэр дууриал авдаг вэ?
-Бид үе үеийн ахмад тамирчдаа хүндэлж хайрладаг. Хөдөлмөрийн баатар Н.Түвшинбаяр, Х. Цагаанбаатар ах гээд үлгэр дууриал болсон тамирчид олон бий.
-Цаашдын зорилгоосоо хуваалцахгүй юу?
-Зорилгоо хэлэх юм бол хязгааргүй зүйл болно. Дэлхий,олимпийн аварга гээд юу эсийг мөрөөдөх билээ.
-Жудо бөхийн спорт танд юуг өгөв?
-Жудо бөх өөрөө их дэг жаягтай спорт шүү дээ. Тиймээс ах зах, найз нөхдөө хүндлэх, хүнтэй зөв боловсон харьцах гээд олон зүйлд суралцсан. Миний хувьд энэ спортоор хичээллэснээр алдсан зүйл байхгүй, харин ч оносон зүйл ихтэй.
Ярилцсанд баярлалаа
Д.Нэргүй
Эх сурвалж: www.dorgio.mn
