Г.Уянга урлагийн карьераа түр хойш тавив

Сэтгүүлч мэргэжилтэй, гишүүн “шар” Г.Уянга тал бүрийн авьяастай нэгэн бололтой. Түүнийг сайхан дуулдаг гэдгийг сонгогчид нь лавтай мэдээгүй байх. Өнгөрсөн хоёрдугаар сарын 14-нд уянгалаг хоолойтой, уртын болон богино, нийтийн, рок, попын ямар ч дууг сайхан дуулчихдаг болохоо сошиал ертөнцөөр дэлгэн харуулж, өндөр үнэлгээг хүртсэн билээ.

Тэрбээр “эрос” хатагтай, Хүүхдийн элч дуучин Т.Ариунааг ажилгүй болгохыг шахаж, хосуудын баярт мэндчилгээ дэвшүүлж, “Жаргаж үзээгүй зул дурлал минь” дууг нь гавьяатаас дутахааргүй дуулж бэлэг барив.

Ийнхүү сайхан дуулчихдаг улс төрч бүсгүй маань ард түмнийхээ дуу хоолой болж, тэмцэгчийн дүр эсгэхээс гадна урлагаар явбал чамгүй амжилт олно гэсэн анализ ч байгаа юм.

Харин гишүүн бүсгүй энэ талаар “Би урлагийн карьераа түр хойш тавьж, улс төрөө сайн хийнэ” гэжээ. Учир нь, тэрбээр саяхан Олон улсын эмэгтэйчүүдийн баяраар ээж нартаа зориулж шүлэг уншсан нь мөн л олны сэтгэлд нийцжээ.

Ийнхүү тал бүрийн авьяастай улс төрч бүсгүйд урлагийн өндөр амжилтыг хүсэн ерөөх хүмүүс олон байна.