С.Баярцогт УИХ-ын дэд даргаар ажиллаж байх үедээ гадаадын банкинд данс нээж мөнгө байршуулснаа хөрөнгө орлоготоо мэдүүлээгүй нь илэрч нэлээд шуугиан дэгдээсэн. Тухайн үед тэрбээр "Би энэ дансаа 2008 оны тавдугаар сард нээсэн гэсэн. Түүний хэлснээр "Legend Plus Capital Limited" компани улс төртэй ямар ч холбоогүй миний хувийн бизнес. Би энэ компаниа найзуудтайгаа байгуулж байсан. Гэхдээ энэ компаниа хөрөнгө орлогын мэдүүлэгтээ бичээгүй нь үнэн. Тиймээс ёс зүйн хариуцлага хүлээхэд бэлэн байгаа" хэмээн мэдэгдэж албан тушаалаа өгч байсан юм.

     Харин түүний гадаадын банкинд офшор дансны хаяг “Ulaanbaatar, Mongolia, China” гэсэн байсан нэлээд хэл ам дагуулсан байдаг. Энэ талаар С.Баярцогт саяхан “Цензургүй яриа” нэвтрүүлэгт оролцох үедээ тайлбар хийсэн. Тэрбээр “Гадаадын банкинд данс нээж сая доллар байрлуулахдаа “Ulaanbaatar, Mongolia, China” гэсэн байхыг анзааралгүй гарын үсэг зурсан” хэмээсэн юм. Харин нийлж компани байгуулсан гурван найз нь хэн болох талаарх асуултад тэрбээр “Энэ тийм чухал юм уу, яагаад? Зүгээр л бизнес хийдэг миний найз нар. Тэр хүмүүсийн нэрийг хэлэх шаардлага байгаа юм уу. Би өөрөө тодорхой хэмжээний бизнес эрхэлдэг хүн. Би хэзээ ч улстөрч хүнтэй хамтарч бизнес хийхгүй. Мөн бизнес хийхээсээ өмнө найз байсан бол бас хамтрахгүй” хэмээн тойруу хариулт хэлсэн.

    Тэгэхээр С.Баярцогттой хамт гадаадын банкинд данс эзэмшдэг гурван найз нь улстөрч биш, өмнө нь түүнтэй найз биш хүмүүс болж таарч байна. Үндсэндээ хамтарч гадны банкинд данс нээж, бизнес эрхлэхийн тулд л танилцсан гэж хэлж болох нь. Ингэснээр С.Баярцогтын нууцлаад байгаа гурван найз хэн бэ гэсэн асуулт энэ удаа ч бас хариултгүй үлдэж байгаа юм.


С.НАРАН

Эх сурвалж: Info.mn