Нэг хэсэг загварын акулуудын толгой дээр цахиур хагалж, өмнө нь гишгэн  чичрүүлж байсан загвар өмсөгч Г.Одончимэг монгол загварынхны нүүрийг  олон жил европын оронд  тахалсан шилдэг моделиудын нэг. Гоёлын тайзан дээр олон удаа гарч байгаагүй  ч топын зангарагтай загвар өмсөгч Г.Одончимэг Австралийн загварын “Сhadwick Agency” агентлагийн нүүр царай болж хажуугаар нь Австралийн “Channel 7” телевизэд ажиллаж байна. Австралид гэр бүлтэй болж үрийн зулай үнэрлэсэн модель бүсгүй нэлээд хэдэн жил Австралид амьдрах бололтой.
-Австралийн загварын агентлагт гэрээгээр ажиллаж, тэр үедээ монголчуудын хувьд дуу алдам үнээр загвар өмсдөг байсныг чинь мэдэх юм. Одоо “Сhadwick Agency”-ын албан ёсны модель болж. Австралийн загварын агентлагтай хэдэн жилийн гэрээтэй ажиллаж байгаа вэ?
-Тэрийг хэлэх боломжгүй л дээ. Мэдээж боломжийн хөлстэй ажиллаж байгаа. Би загвараар чамгүй олон жил явчихжээ. Магадгүй өнөөдөр намайг амжилттай яваа гэж хэлэх юм бол энэ амжилтанд хүрэхийн төлөө би их зүтгэсэн. Хөдөлмөрлөсөн. Анх 15 настайдаа загварын ертөнцөд хөл тавьж байлаа. Миний багш бол “Монгол модель” агентлагийн захирал топ модель Д.Болормаа. Багшаасаа их зүйл сурсан маань надад их зүйлийг өгсөн.
-Чи даатгалын мэргэжилтэй байхаа. Австралид телевизийн чиглэлээр ажиллаж байгаа чинь сонирхол татаад байна л даа?
-Даатгалын эдийн засагч мэргэжилтэй.  Мэргэжлийнхээ дагуу ажиллаж болох байсан ч мэдээллийн салбарт хүчээ сорьж байгаа.  Их өргөн хүрээтэй, сонирхолтой салбар л даа. Австрали улсын Мелбурни хотын “Сhannel 7” телевизэд ажиллах нь монголын загвар өмсөгч бүсгүйд байтугай Австралийн мэргэжлийн сэтгүүлчдэд ховор аз завшаан шүү.
-Загвар өмсөгч Г.Одончимэг монголдоо загварынхаа чиглэлээр ажиллаж байсан бол аль хэдийнэ топ модель болчих байсан?
-Магадгүй л юм.
-Өөрийг чинь хэр удаан хугацаагаар Австралид амьдрахыг сонирхож болох уу? Монгол руу хэзээ ирэх вэ?
-Одоогоор монголдоо очиж ажиллаж амьдарна гэж бодсон төлөвлөсөн зүйл алга.  Хэдэн жилдээ Австралидаа ажиллаж амьдрах байх.
-Өөрийг чинь Австралид хувийн амьдралаа зохиосонд монгол эрчүүд гонсгор байгаа. Охинтой болсонд баяр хүргэе?
-Баярлалаа. Хүүхэд гэр бүлийн аз жаргал гэж үнэхээр үнэн юм гэдгийг би яс махандаа шингэтэл ойлгож байна. Би охиноо төрүүлчихээд нэг хэсэг гэртээ байж охиноо асарсан юм. Тэр хугацаанд би өөрийнхөө нууц авъяасыг илэрүүлсэн шүү. Охиноо харж гэртээ суух хугацаанд би их олон зураг зурсан. Миний зурсан зургууд манай гэрийг чимж байгаа.
-Монгол залуус юугаараа гадаадын залуусаас илүү ялгардаг гэж боддог вэ? Монгол эрчүүдийнхээ талаар ярихгүй өнгөрч чадахгүй нь?
-Монгол залуус энэ сандал дээр сууж байгаарай гэж хэлээд яваад ирэхэд сууж  л байдаг. Маш үнэнч. Тэднийг би сайн гэж хэлэхгүй. Муу ч гэж хэлэхгүй. Яагаад гэвэл би муу гээд хэлчихвэл буруудна. Сайн гээд хэлчихвэл худлаа хэлсэн болчихно.
-Нууц амрагийн талаар ямар бодолтой явдгийг чинь сонирхмоор байна?
-Нууц амрагтай болох эсэх нь тухайн хүнээсээ үүссэн нөхцөл байдлаас л шалтгаална. Сайхан амьдралтай амьдралдаа сэтгэл хангалуун байхад яагаад өөр хүн рүү шунаж явах ёстой гэж.
-Монголдоо ирэх чинь улам цөөрч байна. Ирэхээрээ найзуудтайгаа  уулзаж чадаж байна уу?
-Амжих амжихгүй таарах юм. Найз нөхөд гээд өргөн ойлголт. Надад маш олон тооны найз бий. Харамсалтай нь найз бүхэн дотны найз байж чаддаггүй. Цөөхөн дотны найзуудтай байх нь дээр гэж үздэг хүн л дээ би. Бусад нь жирийн сайхан найзууд.
-Заримдаа хүнд мөнгө аль эсвэл гэр бүлээ сонгох сонголт тулгардаг. Хэрэв өөрт чинь  тийм сонголт тулгарвал алийг нь сонгох байсан бэ?
-Мөнгө мэдээж амьдралд чухал. Гэхдээ мөнгө нэгдүгээрт гэж хэлэхэд хэцүү. Гэр бүл нэгдүгээрт гэж хэлэхэд бас хэцүү. Тэгэхээр мөнгө гэр бүл хоёр хоёулаа адилхан хүний амьдралын чухал зүйл юм болов уу.