Өнөөдөр Олон улсын инээдмийн баярын өдөр. Энэ өдөр Монгол Улсын Соёлын тэргүүний ажилтан, жүжигчин П.Эрдэнэзаан хорвоод мэндэлжээ. Жил бүрийн дөрөвдүгээр сарын 1-нд Монголын хошин урлагийн жүжигчид нэгдсэн тоглолтоо хийдэг учраас жүжигчин П.Эрдэнэзаан хорвоод мэндэлсэн өдрөө тайзан дээр үзэгчидтэйгээ өнгөрүүлдэг. Инээдмийн баярын энэ өдөр инээд бэлэглэгч “Маск” продакшны жүжигчин П.Эрдэнэзаантай цөөн хором ярилцлаа
-“Маск” продакшнаар уран бүтээлийн сонин ихтэй юү?
-Уран бүтээлийн сонин ихтэй. Тоглолтын бэлтгэл гээд зав багатай байна. Манай продакшныхан Монголын Үйлдвэрчний эвлэлийн соёлын төв ордонд “Тэд эх орныхоо төлөө инээлгэсэн юм” тоглолтынхоо хаалтыг энэ сарын 5-ныг хүртэл тоглож байна.
-Хөдөө, орон нутгаар аялан тоглолт хийх үү?
-Энэ сарын 6-наас аймаг, орон нутгийн үзэгчдэдээ зориулж аялан тоглолт хийхээр төлөвлөөд байна.
-Өнөөдөр таны хорвоод мэндэлсэн өдөр. Энэ өдрийг хэрхэн тэмдэглэх гэж байна вэ?
-Монголын хошин шогийн хамтлаг, жүжигчдийн нэгдсэн тоглолт өнөөдөр болно. Тоглолтын дараа найзуудтайгаа төрсөн өдрөө тэмдэглэнэ.
-Инээдмийн баярын өдөр мэндэлсэн тань хошин урлагийн жүжигчин болоход нөлөөлсөн үү?
-Хүмүүс намайг дөрөвдүгээр сарын 1-нд төрсөн гэхээр гайхдаг юм. Хошин шогийн жүжигчин болсон маань төрсөн өдөртэй холбоогүй. Гэхдээ багадаа хүнд нэр хоч өгдөг шооч хүүхэд байсан.
-Төрсөн өдрөөрөө найзуудаасаа ямар бэлэг авдаг вэ?
-Уран зураг л олон бэлэглэдэг юм.
-Зураг зурах таны бас нэгэн авьяас. Хүүхдийн зургийн уралдаанд түрүүлж байсан гэж сонссон юм байна?
-Хүн бүр л хүүхэд байхдаа зураг зурдаг шүү дээ. Би ч гэсэн дөрөв, таван настайдаа их зурдаг байсан. Хэд хэдэн зургийн уралдаанд түрүүлж байсан.
-Дөрөвдүгээр сарын 1-нд хүмүүс нэгнийгээ хуурах нь элбэг байдаг. Харин та энэ баярын талаар ямар бодолтой явдаг вэ?
-Инээдмийн баяр хүмүүст инээд баяслаас гадна аз жаргал мэдрүүлдэг. Хүмүүс бие биенийгээ хуурахаас илүү инээд, баясал бэлэглээсэй гэж боддог
Х.ЭРДЭНЭЗАЯА
Эх сурвалж: Unen.mn
