Холливуд төдийгүй монгол түмэнд танил болсон жүжигчин эмэгтэй Жулиа Робертс монголд зочилсныхоо дараа хийгдсэн нэгэн баримтат кинондоо уралдааны морь унаад гараанаас гарч байгаа хүүхдүүдийг хараад “Их сонин, томчууд хүүхдүүдээ уралдаанд морь унуулаад явуулахдаа санаа зовсон нь огт мэдэгддэггүй. Аргагүй байхдаа монголын сайхан тал нутагт хүүхэд багаасаа морь унадаг нь бидний амьсгал авахдаа адил энгийн зүйл” гэж хэлсэн байдаг. Бидэнд өөрсдөд дадал болсон зүйл бидний өв уламжлал, ёс заншил болсон байдаг. Тэгвэл өдөр бүр телевиз бүрээр шахуу үзэж байгаа “солонгос” кино бидний ёс заншил өв уламжлалд үр хүүхдээр дамжин очих бий гэх айдас хэний ч санаанд орж ирж болох. Үнэндээ үндэсний өв соёл зан үйл, тусгаар тогтнолын мөн чанарыг харуулах нэвтрүүлэг хийж “солонгос” кинотой өрсөлдөх хүн хүч, хүчит техниктэй телевиз хир олон бол. Ёстой хуруу дарам. Мэдээллийн ийм ороо бусгаа цаг үед СҮЛД ТВ үүдээ нээж үндэсний бахархлыг сэргээх олон сайхан нэвтрүүлэг хийж монгол хүний оюуны дархлааг бататгаж байгаа нь хамгийн зөв шийдэл гэлтэй. Амралтын өдөр үзэгчдэд шууд хүрдэг “Хүлгийн үүрсээнд” хэмээх нэвтрүүлгийг онцлоё. Аймаг бүрээс төлөөлөл болон ирсэн малчин, сэхээтэн, жирийн иргэд өөр өөрийн үндэсний ёс заншил өв уламжлал бүр цаашилбал түүхийн үнэт мэдээллээ хуваалцан нутаг усаараа бахархан ярьж байхтай бараг хагас сайн өдөр бүр таарах боломжтой юм байна. Нэг дор 20 гаруй хүн оролцож байгаа нэвтрүүлэгт Говь-Алтай аймгийнхан ажилсаг гэдгээ онцолж байхад, Баян-Өлгий аймгийнхан тэртээ мянга гаруй км-н цаанаас үндэсний бахархалд тооцогдох бүхнээ авч ирсэн нь содон байсан. Нэвтрүүлгийн нэр “Хүлгийн үүрсээнд” гэж байлаа. Монголд аймаг ч байна сум ч байна баг ч байна. Нэвтрүүлэг үргэлжлээд байвал сайхан л байна.

Эх сурвалж: www.dorgio.mn