Хэрэглэгчдийн эрх ашгийг хамгаалах нийгэмлэгүүдийн нэгдсэн холбооноос “Хүнсний аюулгүй байдлыг  хангах үндэсний хөтөлбөр хэрэгжүүлэх тухай” асуудлаар Ерөнхий сайд Ч.Сайханбилэгт саналаа хүргүүллээ. Энэ талаар тус холбооныхон сэтгүүлчдэд мэдээлэхдээ “үндэсний хөтөлбөрийг үр дүнтэй хэрэгжүүлэх зайлшгүй шаардлага тулгараад байна” гэж онцолсон юм. 

Тэдний санал болгосноор жимс, жимсгэнэ, төмс, хүнсний ногоо болон мах махан  бүтээгдэхүүн, ундны ус гэсэн үндсэн гурван хэсэг дээр хөтөлбөр хэрэгжүүлэх ажээ. Ялангуяа, ундны усны асуудал тулгамдсан хүнд сэдэв болоод байгаа аж. 2012 онд нийгмийн эрүүл мэндийн хүрээлэнгийн  судалгаагаар Говь-Алтай, Өвөрхангай, Сүхбаатар аймгийн иргэдийн ундны усанд магни, Өмнөговь, Төв, Сүхбаатар аймгийн иргэдийн ундны усанд нитрит, Дорнод, Сүхбаатар, Төв, Говь-Сүмбэр  аймгийн ундны усанд  төмрийн агууламж стандартад заасан хэмжээнээс их гарчээ. Мөн ундны усны нийт эх үүсвэрийн 17.3 хувь, үүнээс төвлөрсөн  эх үүсвэрийн 11.2, төвлөрсөн бус эх үүсвэрийн 26.5 хувь нь нян судлалын үзүүлэлтээр шаардлага хангахгүй байгаа аж. Иймээс Засгийн газраас нэн даруй Хүнсний аюулгүй байдлыг хангах үндэсний хөтөлбөр хэрэгжүүлэх, хүнсний аюулгүй байдлыг хариуцсан бие даасан байгууллага байгуулахыг шаарджээ.

Б.Баяр