Дөрөвхөн настай бяцхан охиноо онц хэрцгийгээр хөнөөсөн хэрэгт талийгаач охины төрсөн эцэг Т.Цогт хамтран амьдрагч Г.Маралмаа нарыг сэжиглэн шалгаж байгаа. Тодруулбал, тэднийг ШШГЕГ-ын цагдан хорих 461 дүгээр ангид саатуулан шалгаж байгаа юм. Тэдэнд холбогдох хэргийн мөрдөн байцаалт дуусч, яллах дүгнэлт үйлдүүлэхээр прокурорын байгууллагад шилжүүлсэн байна.
Мөрдөн байцаалтын явцад Т.Цогт ар гэрийнхэн хуулийн байгууллагад танилтай учраас хэргийг хамтран амьдрагч Г.Маралмаад тохох гэж байгаа тухай мэдээлж байсан. Тэгвэл Т.Цогт нь хэргээ хамтран амьдрагч Г.Маралмаад тохсон байж болзошгүй нөхцөл байдал үүсчээ. Тодруулбал, мөрдөн байцаалтын явцад Т.Цогтод Эрүүгийн хуулийн тусгай ангийн 107.3, 246.1-т зааснаар хэрэг үүсгэн прокурорт яллах дүгнэлт үйлдүүлэхээр шилжүүлсэн байна. Тус зүйл заалтуудад бусдыг амь биед нь аюултай нөхцөлд байхад нь тусламж үзүүлэхгүй байх, энэ хэргийн улмаас хохирогч нас барсан, бусад хүнд хор уршиг учирсан бол гурваас таван жил хүртэл хугацаагаар хорих ял шийтгэх, гэмт хэргийг мэдсээр байж зохих байгууллага, албан тушаалтанд мэдээлээгүй бол хөдөлмөрийн хөлсний доод хэмжээг таваас тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл нэгээс гурван сар хүртэл хугацаагаар баривчлах ял шийтгэнэ хэмээн заасан байдаг аж. Тэгэхээр Т.Цогтын хувьд энэ хэрэгт буруудлаа гэхэд баривчлах ял эсвэл, 3-5 жилийн хорих ялаар шийтгүүлэх аж.
Харин хамтран амьдрагч Г.Маралмаагийн хувьд Эрүүгийн хуулийн тусгай ангийн 91.2.12, 91.2.15-т зааснаар буруутгагдаж байгаа юм байна. Тус зүйл заалтуудад хохирогчийг биеэ хамгаалж чадахгүй байгааг мэдсээр байж, онц хэрцгий аргаар хөнөөсөн бол 15-25 жил, эсвэл цаазын ялаар шийтгүүлнэ гэж заажээ. Гэхдээ Монгол Улс эмэгтэй хүнд цаазын ял өгдөггүй учраас Г.Маралмаагийн хувьд 15-25 жилийн хорих ял сонсох аж.
Юутай ч охиноо хөнөөсөн хэрэгт буруутгагдаж байсан Т.Цогт, Г.Маралмаа нарын хэрэгт Г.Маралмаа охиныг хөнөөсөн зүйл ангиар буруутгагдаж, Т.Цогт хэргийг нуун дарагдуулсан гэж буруутгагдаж байна.
Охины ажил явдалд төрсөн эцэг Т.Цогтын ар гэрээс нэг ч хүн оролцоогүй байна. Мөн оршуулгын зардалд нэг ч төгрөг хандивлаагүй гэнэ. Энэ талаар талийгаач охины өмгөөлөгч Б.Манлайжав“Оршуулгын зардалд сэжигтнүүдийн талаас 3 сая 500 мянга орчим төгрөг гаргуулахаар болсон. Гэвч одоогоор сэжигтнүүдийн талаас барагдуулсан зүйл алга. Мөн талийгаач охины ажил явдалд Т.Цогтын ар гэрээс нэг ч хүн ирж оролцоогүй” гэлээ.
Энэхүү хэрэг хэрхэн шийдэгдэх нь нийгэмд хүлээлт үүсгээд байна. Т.Цогт нь ШШҮХ-нд шинжээчээр ажилладаг байсан учраас хэрэгт нөлөөлөх вий гэсэн хардлага олон нийтийн дунд байсан. Гэвч энэ хэрэгт нийгэм тэр аяараа анхаарал тавьж байгаа учраас хэрэг үнэн зөв шийдэгдэх байх гэсэн горьдлого байгаа юм.
Хэргийг талийгаач охины ээжийнх нь найз өөрийн фэйсбүүк хуудаснаа “Миний найз Ө нь дөрөвхөн настай хайрт охиноо 2015 оны хоёрдугаар сарын 21-нд төрсөн эцэг болон хойд эхийнх нь гарт хэрцгий, бусармаг үйлдлээс болоод алтан амийг нь алдчихлаа” хэмээн бичсэнээр энэ хэрэг олон нийтэд ил болсон юм.
Б.Анир
Эх сурвалж: Zaluu.com
