Богдхан уул бол эртнээс дархан цаазтай, онгон дагшин уул юм. Түүхийн эх сурвалжуудыг сөхөж үзвэл бүр ван хан Тоорилын үеэс энэ уулыг тахиж  тайж, дархалж байжээ. Гэтэл сүүлийн 20-иод жилд энд хамаа намаагаа алдаж, мөнгө ихтэй, лобби сайтай компаниуд  нь тухайн үеийн байгаль орчны сайдын шийдвэр гэгчээр далимдуулан газар эзэмшин, зориулалт бусаар ашиглаж иржээ. Одоо энд ойролцоогоор  229.5 га талбайд газар ашиглах, эзэмших эрхийг давхардуулан олгоод байгаа аж. Хуулиар бол улсын тусгай хамгаалалттай газарт аялал жуулчлалын зориулалтаар газар ашиглуулдаг. Гэвч зөвхөн Зайсан толгойн орчимд гэхэд газар ашиглах зөвшөөрөл авсан хуулийн этгээдийн 90 гаруй хувь нь орон сууцны зориулалтаар барилга барьж ашиглаж байгаа. Тиймээс саяхан Засгийн газраас Богд ууланд газар ашиглуулах, эзэмшүүлэх шийдвэрүүдийг   судлан шалгаж, шаардлагатай арга хэмжээ авах үүргийг Байгаль орчин, ногоон хөгжил, аялал жуулчлалын яам, хотын захиргаанд даалгажээ.   Өөрөөр хэлбэл, Богд ууланд газар ашиглаж, эзэмшиж буй компаниудыг бүгдийг нэгбүрчлэн шалгаж журамлахаар шийдсэн байна.

Б.Баяр 

Эх сурвалж: Tumen.mn