Холливудынхны хийсэн цуврал кинонууд дундаас хамгийн шилдэгт “Галзуу хурд” багтдаг. Энэ дүгнэлттэй зөрөх хүн
гарахгүй байх. Өнөөдрийг хүртэл долоон цуврал гарахад бүх анги нь гайхалтай болсон. Өөр өөрийн гэсэн өвөрмөц шийдлийг анги болгондоо харуулсан. Мөн алдартай жүжигчдийн “цуглуулга” ч болж чадлаа. Хамгийн сүүлд “Галзуу хурд” киноны долдугаар анги гарч, Монгол дахь нээлтээ өнгөрсөн баасан гарагт хийлээ.Монголд нээлтээ хийхийн өмнө “Галзуу хурд-7” дэлхий дахинд гайхалтай амжилтуудыг үзүүлжээ. Нээлтээ хийгээд долоо ч хоноогүй байхдаа дэлхийн зах зээл дээрээс тэрбум ам.доллар цуглуулсан. Нээлтээ хийсэн эхний өдрөө бүх тасалбар нь зарагдсан гээд гайхалтай амжилтууд гаргажээ. Энэ нь “Галзуу хурд-7” ямар гайхалтай болсныг баталж өгсөн юм.
Мөн гол дүрийн жүжигчин Пол Уолкер “Галзуу хурд”-ынхаа долдугаар ангийг гүйцээж тоглож чадаагүй нь түүнийг шүтдэг сая сая фэнүүдийг кино театр руу татах нэг сэжим болсон биз. Түүний тоглосон хамгийн сүүлийн кино, тэр дундаа “Галзуу хурд” шүү дээ. “Галзуу хурд”-ын энэ ангид өмнөх ангиудад тоглосон шилдэг жүжигчдээс гадна “Тээвэрлэгч”-ээрээ алдартай Жэсон Стэтхэм орж ирсэн нь үзэгчдийн сонирхлыг маш ихээр татсан.
Мань хүн ч жинхэнэ төгс эсрэг дүрийг бүтээсэн байна билээ. Түүнд эсрэг дүр сайхан зохиж байсан. “Галзуу хурд-6” төгсөхдөө Стэтхэм гарч ирдэг. Токиод Ханыг алаад, Доминикийг утсаар, занаснаар төсдөг. Тэгвэл түүнийг ямар дүрд тоглож, хэрхэн Доминикийн багтай тулахыг дэлхийн сая сая хүн үзэхийг хүсч байсан байх. Тэгвэл Жэсон энэ удаад ах Шоугийн дүрээр гарч ирж, Доминик Торреттогийн багаас өшөө авахын төлөө тэмцэнэ. “Галзуу хурд-6” дээр Иан Шоу гэдэг нөхрийг онгоцноос унагаж, бэртээгээгүй юу.
Энэ киног шимтэн үзсэн хүмүүс санаж байгаа биз. Тэгвэл ах Шоу бол төгс алуурчин, бэлтгэгдсэн цэрэг. Доминик болон түүний баг болоод мөрдөгч Хоббсын хар дарсан зүүд байх болно /Дуэн Жонсон/. Кино эхлэхэд ах Шоу /Жэсон Стэтхэм/ бүхэл бүтэн эмнэлгийг сүйдэлж, дүүгээ сайн асрахыг сануулаад гарч явна. Ингэснээр түүнийг ямар дүрд тоглох бол гэсэн хүлээлтийг киноны эхэнд л тайлж байгаа юм. Харин Доминикийн баг амар тайван амьдарч байх нь тэр. Доминик өөрийн дурлалт бүсгүй Леттитэй /Мишель Родригес/ цагийг өнгөрөөж, хуучны сайхан цагийг дурсч, уралдаанд оролцоно. Мөн Летти бүх зүйлээ санахыг хичээсээр. Харин Бриан эхнэр Миагийнхаа хамтаар сайхан амьдарч, хүүхдээ цэцэрлэгт хүргэж өгч, гэр бүлийн машин унаад л…Цагдаа Хоббс ажлаа хийж, хэргийн материалтай танилцсан шиг амар жимэр амьдарч байх болно.
Гэтэл ах Шоу гарч ирж, бүхий л амгалан тайван байдлыг сүйдлэх нь тэр. Эхлээд Хоббс дээр очиж, булчин шөрмөс нь зангирсан хоёр нөхөр гайхалтай тулаан өрнүүлнэ дээ. Эцэст нь Шоу гар бөмбөг шидэж, Хоббс хамтрагч бүсгүйгээ аврах гэж цонхоор үсэрч, машин дээр унаснаар эмнэлэгт хэвтэнэ. Түүний дараа Брианы гэрийн үүдэнд илгээмжээр тэсрэх бөмбөг илгээж, Доминик, Бриан болон эхнэр Миа, хүү Жекийг нь алахыг оролдоно. Ингээд л амар тайван амьдарч байсан хурдлах дуртай залуусын амьдрал өөрчлөгдөж, ах Шоуг олох эрэлд гарахаас өөр аргагүй болно.
Энэ зуур Засгийн газрын нууц төлөөлөгч болох эрхэм Доминизтой уулзаж, “Бурханы нүд” гэгч дэлхийн хаанаас ч олохыг хүссэн хүнээ бүхий л боломжтой системийг ашиглаж олж болдог программ бүтээсэн хакер Рэмси гэгчийг олж өгөхийг хүснэ. Хэрвээ түүнийг олоод, “Бурханы нүд”-ийг авчихвал Шоуг олж өгөхөө амална. Ингээд л өөр өөрсдийнхөөрөө амьдарч байсан багийнхан эргэн нийлж, Кавказын уулсаар Рэмси гэгч хакерыг авч яваа бүлэглэл рүү дайрахаар болно доо. Тэд онгоцоор яваад, хэдэн арван метрийн өндрөөс машинтайгаа бууна. Ууланд дээрэмчдийн бүлэглэлтэй жинхэнэ галзуу уралдаан, тулааныг хийнэ. Эхний ангиуд дээр хурдалж байсан машинууд энэ анги дээр нисэх шиг л болно. Уулын уруу үсэрнэ. Амиа эрсдүүлэн байж аварсан хакер Рэмси гайхалтай эмэгтэй байж таарна.
Харин “Бурхны нүд” түүнд байхгүй байжээ. Рэмсиг аврах ажиллагаанд ах Шоу ч бас оролцохоо яаж мартах билээ. Бас л галзуу хурд, тулаан, уулын уруу машинтай буух үзүүлбэр. Гайхалтай гэхээс өөр юу гэх билээ. Арайхийн хүнд тулаанаас амьд гарсан залуус Абу Даби хот руу “Бурхны нүд”-ийг олохоор явна. Учир нь хатагтай хакер автомашины амортизаторт нуугаад, найз руугаа явуулчихсан учир шүү дээ. Дэлхийд гайхагдсан Абу Даби хотод очоод, тэрбумтан залуугийн үдэшлэгт оролцож, 3.5 сая ам.долларын үнэтэй машинаас “Бурхны нүд” программыг нуусан амортизатороо авах гэж оролдоно.
Тэгэхдээ дэлхийд хамгийн өндөрт тооцогдох гурван том цамхагийн хооронд машинтай нисч өгнө дөө. Трейлер дээр гардаггүй хэсэг шүү. Ах Шоу мэдээж тэднээс дутахгүй, Абу Дабид ч бас байна. Энэ мэтээр аюулыг сөрсөөр арай гэж “Бурхны нүд”-ээ салгаж аваад, Шоуг хайж олно. Гэтэл өнөөх нь “Бурхны нүд”-ийг авахыг оролдож байсан дээрэмчдийн бүлэгтэй нэгдэж, Засгийн газрын төлөөлөгчийг шархдуулж, цэргүүдийг нь алаад, төхөөрөмжийг авчихна. Харин хакер Рэмсиг Торретогийн бүлэг авч явна.
Эцсийн тулаан Рэмсиг хамгаалахын төлөө өрнөж, гайхалтай үйл явлуудаар дүүрэн өнгөрнө дөө. Мөн энэ ангид өмнөх бүх ангиудад гарч байсан гол дүрийн жүжигчид бүгд цухас цухас гараад өнгөрч байна билээ. Төгсгөлдөө Полд зориулсан хэсэг гарч, Бриан Миа хоёр дахиад хүүхэдтэй болно. Амьдралд аз жаргалтай өдрүүд эхэлнэ. Тийм өдрүүдийг авчрахын тулд Торрето, Бриан, Теж, Летти хэрхэн тэмцлээ дээ. Одоо “Галзуу хурд-8” гэж гарахгүй нь тодорхой. Киноны төгсгөлд ч үүнийг хэлсэн.
Пол Уолкергүй бол “Галзуу хурд” гэж үгүй. Доминикийн баг төрсөн хотдоо дээрэмчдийг хэрхэн устгаж, ах Шоутай яаж тэмцэж байгааг “Тэнгис” кино театраас үзээрэй. Мөн хөнгөн инээгээд авах ч хэсгүүд олон бий. Төсөөллөөс илүүг “Тэнгис”-ээс. Та “Галзуу хурд-7”-г хэрхэн төсөөлж байна. Түүнээс чинь хэд дахин илүү мэдрэмжийг өгнө гэдгийг амлая.
Эх сурвалж: www.mminfo.mn
