ОХУ-ын Ерөнхийлөгчтэй ямарч цензургүй, шууд холбогдож хүссэн, сонирхосон, эргэлзсэн бүх асуултаа тавьж, хариулт авч болох уламжлалт “шууд холбоолт” энэ жилийн арга хэмжээ өнөөдөр Москвагийн цагаар 12:00 цагт эхэлнэ.
Түүнд асуулт тавихыг хүссэн хэн боловч төрийн тэргүүний цахим хаягаар холбогдож болохоос гадна 8-800-200-40-40 утсаар асуултаа тавьж болно. Түүнчлэн бидний хэлж заншснаар гар утаснаасаа залгах болон мессеж илгээхэд үнэ төлбөргүй ажээ.
Өнгөрсөн жилүүдэд ОХУ-ын Ерөнхийлөгч В.Путинд тавьж байсан хачирхалтай болон сонирхолтой асуултуудын хариултаас цөөн хэдийг сонирхуулж байна. Үүнд:
Асуулт: 2007 он. Новосибирск хотын иргэн Александр Сиберд: -“АНУ-ын Төрийн нарийн бичгийн дарга хатагтай Мадлен Олбрайт Сибирийн байгалийн асар их баялагийг зөвхөн Орос орон эзэмшиж байгаа нь шударга бус явдал” хэмээн хэллээ. Үүнийг та хэрхэн үнэлж байна вэ?
Хариулт: -“Олбрайтыг ингэж хэлснийг би сонсоогүй юм байна. Гэхдээ хэн нэгэн улс төрчийн толгойд иймэрхүү зүйл эргэлдэж байхыг үгүйсгэхгүй. Тэдний улс төрийн эротик хүсэл, сонирхол нь өөрөө өөртөө дур тавьж, таашаал авахад нь тустай байж мэдэх юм...
Асуулт: 2009 он. Иргэн Эрнест Мацкявичюс: -“Сүүлийн үед таныг нэг бол алаг эрээн бартай, эсвэл леопарттай, бүр халимтай цуг авахуулсан зураг, видео дүрсийг телевизороор байнга харах боллоо. Та эдгээр амьтдын дунд байхдаа өөрийн сайд нартай байгаагаас илүү аз жаргалтай харагдах юм. Энэ үнэхээр тийм байна уу, эсвэл тэгж харагдаад байна уу? гэсэн асуулт тавьжээ.
Хариулт: -“Миний санаж байгаагаар Оросын хаадуудын нэг Аугаа Фридрих хэлэхдээ би хүмүүсийг илүү сайн таньж мэдэх тусам нохойг илүүтэй хайрламаар санагдах юм гэж хариулсан байдаг. Би үүнтэй санал нэг байна. Гэхдээ энэ нь миний сайдууд, найз нөхөд, коллегиудад огт хамаарахгүй шүү. Би зүгээр амьтадад их хайртай... гэх мэтээр хариулсан байдаг.
Бэлтгэсэн Г.Чугаа
