Даваа гарагт Сомалид НҮБ-ын хүүхдийн сангийн ажилтнуудыг тээвэрлэж явсан автомашин дэлбэрч 7 хүн амь үрэгдсэн талаар “ВВС” агентлаг мэдээллээ. “Аль-Шабааб” бүлэглэл уг халдлагыг үйлдсэний хариуцлагыг  хүлээхээ мэдэгдсэн байна.

Сомалийн нийслэл Могадишу хотоос хойш 800 км зайтай орших Гароуэ хотод болсон ба НҮБ-ын Хүүхдийн сан буюу ЮНИСЕФ-ийн ажилтнуудыг тээвэрлэж явсан уг автомашин орон сууцны хорооллоос гарч НҮБ-ын байр руу явж байсан аж. Ойрхи Дорнодын хэвлэлүүдэд бичсэнээр, машинд тэсрэх бөмбөг тавьсан байжээ.

Амиа алдсан хүмүүсийн дотор Кени болон Сомалийн иргэд байжээ. “Аль-Шабааб” бүлэглэлийнхэн Сомалийн засгийн газрыг түлхэн унагахын тулд тус улсад удаа дараа халдлага үйлдсээр байна. “Аль-Каида”-тай нягт холбоотой энэ бүлэглэл дөрөвдүгээр сарын 2-нд хөрш Кени улс дахь нэгэн их сургуулийн цогцолбор руу дайран орж, 140 гаруй оюутныг хөнөөсөн юм.

О.Мөнхдуулга