“Исламын төр улс”-ын алан хядагчид өчигдөр Ливийн телевизийн 5 сэтгүүлчийн амийг хороосон тухай Ройтерс агентлаг мэдэгдлээ.
Энэ мэт ажил үүргээ гүйцэтгээж яваад амь эрсдэх сэтгүүлчдийн тоо жилээс жилд буурахгүй байгаа ба харин ч өсөх хандлагатай байгаа талаар Женев хотод төвтэй “Пресс Эмблем Кэмпэйн” байгууллагын Ерөнхий нарийн бичгийн дарга Блэйс Лемпен ярьж байна.
Тус байгууллага нь 2004 оны зургаадугаар сард байгуулагдсан ба зөрчил мөргөлдөөн, эмх замбараагүй нөхцөлд ажиллаж байгаа сэтгүүлчдийн амь нас, аюулгүй байдлыг хамгаалах чиглэлээр ажилладаг ажээ.
“Пресс Эмблем Кэмпэйн” байгууллага сэтгүүлчдийн амь насанд халдаж байгаа улс орон, бүс нутгийг судалж үзэхэд Ойрхи Дорнодод 52, Азид 32, Латин Америкт 29, Африкт 15, Европт 10 сэтгүүлч амиа алдсан гэх тоо гарсан ба өнгөрсөн онд нийтдээ 138 сурвалжлагч ажил үүргээ гүйцэтгэж яваад амь насаа алдсан байна.
Энэ аймшигт тоог өнгөрсөн таван жилийн хугацаагаар харвал нийт 624 сэтгүүлч амь насаа алдаж байсан ба жилд дунджаар 125, долоо хоногт 2 сэтгүүлч бусдын гарт амиа алдсан байна.
Бэлтгэсэн Г.Чугаа
