Шинэчлэлийн Засгийн газар байгуулагдсаны дараахан барилгын Бэрэн группын захирал А.Хүрэлшагай Засгийн газрын хэрэгжүүлэгч агентлаг Газрын харилцаа геодези зураг зүйн газрын даргаар ирсэн нь саяхан. Баттай эх сурвалжийн мэдээлж байгаагаар тэрээр Ардчилсан намд 2 сая доллар хандивласан нь Монголд хэн намд ахиухан мөнгө өгсөн нь дээгүүр албан тушаал хашч болдог тогтолцооны гажуудлын нэг илрэл болж байгаа юм. А.Хүрэлшагай дарга төрийн захиргааны байгууллагад ирмэгцээ хандивласан мөнгөө эргүүлэн олж авахын төлөө улайран зүтгэсэн байна. Өдгөө түүнийг Авилгатай тэмцэх газар 30-аад тэрбум, Захиргааны хэргийн шүүх 5 тэрбум төгрөгийн төсөв мөнгө, тендерийн асуудлаар хянан шалгаж байгаа ажээ. Баримт сөхвөл:

Баримт 1

Холбогдох албан тушаалтан: Дарга А.Хүрэлшагай

Тендер: Монгол улсын 2013 оны төсвийн тухай хуулийн 21.1.6-д тусгагдсан ҮОЗМДБ-ийг байгуулах ажлын хүрээнд улсын төсвийн санхүүжилтээр “Монгол орны одоо байгаа төрөл бүрийн масштабтай зураг /геологи, геоморфологи, гадаргын хэрчигдэл, шинэ тектоник, газар чичирхийлэл, ашигт малтмал, инженнер-геологийн нөхцөл, мужлал, онцгой шинж чанар бүхий ул хөрс, газар хөдлөл, цэвдэг, гидрогеологи, гидрологи, түүх археологи/-ын тоон өгөгдлийн санг нэгдсэн арга зүй програм хангамж, стандартын дагуу нэгтгэж орон зайн мэдээллийн дэд бүтцийн геосистемийн давхарга байгуулах” 5 090 400 000 төгрөгийн өртөг бүхий ажлын тендер зарлагдсан бөгөөд геологийн “Инжгеотех” ХХК гүйцэтгэгчээр шалгарсан. /2013/52 тоот гэрээ/

Тайлбар: Энэ тендерт нэр бүхий хэд хэдэн мэргэжлийн компани өрсөлдсөн бөгөөд геологийн Инжгеотех ХХК шалгарсан нь:

• Инжгеотех ХХК-ийн захирал М.Мягмаржав нь агентлагийн дарга А.Хүрэлшагайгийн найз нь бөгөөд тендерийн дүн гарахаас өмнө гэрээний төсөл нь бичигдсэн байсан
• Энэ тендерт өрсөлдөөд ялагдсан Золотон ХХК-ийн захирал М.Тодбилэг, Х.Уламбадрах нар дарга А.Хүрэлшагайг АТГ, Захиргааны хэргийн шүүхэд авилгалын асуудлаар өгсөн бөгөөд одоо шүүх хурлын процесс явагдаж байгаа
• Энэ тендерийн ажлын даалгаварт гүйцэтгэхээр заагдсан ажлууд нь Ашигт малтмалын газар улсын төсвийн мөнгөөр урьд нь хийлгүүлсэн ажлуудтай давхцаж байна. Ашигт малтмалын газрын мэдээллийн санд эдгээр зургууд нь байдаг бөгөөд урьд нь геологи, хайгуулын Инжгеотех ХХК Ашигт малтмалын газрын захиалгаар энэ ажлыг гүйцэтгэж байсныг салбарын инженерүүд нотлож байгаа нь төсвийн мөнгийг үр ашиггүй зарж, мөнгө угааж байгаа нь илт байна
• 2014 оны эхээр ажлын даалгаварт нэмэлт тодотгол хийж гүйцэтгэгчээс авах зургуудын масштабыг гэнэт өөрчилсөн байна

Баримт 2

Холбогдох албан тушаалтан: Дарга А.Хүрэлшагай

Тендер: Монгол улсын 2013 оны төсвийн тухай хуулийн 21.1.6-д тусгагдсан ҮОЗМДБ-ийг байгуулах ажлын хүрээнд улсын төсвийн санхүүжилтээр “Монгол орны одоо байгаа төрөл бүрийн масштабтай зураг /геологи, геоморфологи, гадаргын хэрчигдэл, шинэ тектоник, газар чичирхийлэл, ашигт малтмал, инженнер-геологийн нөхцөл, мужлал, онцгой шинж чанар бүхий ул хөрс, газар хөдлөл, цэвдэг, гидрогеологи, гидрологи, түүх археологи/-ын тоон өгөгдлийн санг нэгдсэн арга зүй програм хангамж, стандартын дагуу нэгтгэж орон зайн мэдээллийн дэд бүтцийн геосистемийн давхарга байгуулах” 553 300 000 төгрөгийн өртөг бүхий зөвлөх ажлын тендер зарлагдсан бөгөөд ОХУ-ын Экотехконтроль ХХК зөвлөхөөр шалгарсан. /2013/64 тоот гэрээ/

Тайлбар: Энэ зөвлөх ажлын гүйцэтгэгчээр ОХУ-ын Экотехконтроль ХХК шалгарсан нь:

• Экотехконтроль ХХК-ийн захирал В.В.Дмитриев нь агентлагийн дарга А.Хүрэлшагайгийн багш нь бөгөөд тендер зарлагдахаас өмнө ГХГЗЗГ-т айлчлан ирж ажлын даалгавар болон бусад бичиг цаас материалуудыг хамтарч хийсэн байдаг. Монголд ирэх зардлыг Инжгеотех ХХК гаргасан байдаг бөгөөд өдгөө санхүүг нь шалгахад баримтууд нь гарч ирнэ.
• Энэ гэрээт ажил нь Тагнуулын ерөнхий газраас ирсэн зөвлөмж, чиглэлийн дагуу нууцын зэрэглэлтэй ажил бөгөөд гадны гүйцэтгэгчийн зүгээс нууцын горимд ажил явахгүй байгаа. Тухайлбал: 2013 оны 07-р сард агентлагийн дарга нууцын зэрэглэлтэй ажлыг байгууллагын цахим хуудсанд нээлттэй байршуулсныг Золотон ХХК-ийн захирал нотлох баримттай нь АТГ болон шүүхэд өгсөн байна

Баримт 3

Холбогдох албан тушаалтан: Дарга А.Хүрэлшагай, Албаны дарга С.Энхтуяа

Тендер: Монгол улсын 2013 оны төсвийн тухай хуулийн 21.1.58-д тусгагдсан улсын төсвийн санхүүжилтээр “Улаанбаатар хотын Сүхбаатар, Чингэлтэй дүүрэг, Дорнод аймгийг хаягжуулах /хаягийн мэдээллийн систем байгуулах/” 2 760 000 000 төгрөгийн өртөг бүхий ажлын тендер зарлагдсан бөгөөд Геокад ХХК гүйцэтгэгчээр шалгарсан. /2013/49 тоот гэрээ/

Тайлбар: Энэ тендерт нэр бүхий хэд хэдэн мэргэжлийн компани өрсөлдсөн бөгөөд Геокад ХХК шалгарсан нь:

• Энэ ажил нь “Улаанбаатар хотын Сүхбаатар, Чингэлтэй дүүрэг, Дорнод аймгийг хаягжуулна” хэмээн төсвийн тухай хууль, гэрээ, ажлын даалгавруудад заагдсан боловч одоог хүртэл эдгээр газруудад огт хийгдээгүй бөгөөд зөвхөн Архангай аймагт хийгдсэн байдаг. Шат шатны санхүүжилтийг шилжүүлэхэд ажил шалгаж авсан, мэдээлэл хүлээн авсан бүх актууд хуурамчаар үйлдэгдсэн. Агентлагийн дарга А.Хүрэлшагай, албаны дарга С.Энхтуяа нар нь Архангай аймгийн уугуул бөгөөд 2016 онд сонгуульд нэр дэвших зорилгоор ашиг сонирхлын зөрчилдөө автан төсвийн тухай хууль, анх байгуулсан гэрээ, ажлын даалгавраа зөрчин обьектыг дур мэдэн өөрчилсөн.
• Энэ тендерийн зөвлөхөөр Геомэп ХХК шалгарсан бөгөөд албан бичгээр ирүүлсэн сүүлийн дүгнэлтүүдэд нь Архангай аймгийн хаягжуулалтын ажлууд дангаараа орж ирсэн гэдгийг нотлож байна.

• Энэ гэрээт ажил нь 2014 оны 12 дугаар сарын 30-ны өдөр бүрэн дуусах ёстой бөгөөд одоогоор бүрэн хүлээж авсан ажил байхгүй, төсвийн мөнгө үргүй зарцуулагдсан байна.

Баримт 4

Холбогдох албан тушаалтан: Дарга А.Хүрэлшагай

Тендер: Монгол улсын 2013 оны төсвийн тухай хуулийн 21.1.6-д тусгагдсан ҮОЗМДБ-ийг байгуулах ажлын хүрээнд улсын төсвийн санхүүжилтээр “Газар ашиглалтын тохиромжтой байдлын үнэлгээний зураг /газрын төлөв байдал, чанарын бүсийг газар зүйн мэдээллийн систем ашиглан боловсруулах” 303 600 000 төгрөгийн өртөг бүхий ажлын тендер зарлагдсан бөгөөд геологийн “Инжгеотех” ХХК гүйцэтгэгчээр шалгарсан. /2013/66 тоот гэрээ/

Тайлбар: Энэ тендерт нэр бүхий хэд хэдэн мэргэжлийн компани өрсөлдсөн бөгөөд геологийн Инжгеотех ХХК шалгарсан нь:

• Инжгеотех ХХК-ийн захирал М.Мягмаржав нь агентлагийн дарга А.Хүрэлшагайгийн найз нь бөгөөд нэг компанид өртөг өндөртэй олон ажил өгч байна.
• Инжгеотех ХХК нь геологийн компани бөгөөд урьд өмнө газрын төлөв байдал, чанарын бүсийг газар зүйн мэдээллийн систем ашиглан боловсруулах ажлыг хийж байсан туршлагагүй байна.
• Тэр үед энэ ажлыг хүчээр энэ компанид өг гэж шахаж дарамталж байсан тухай салбарын инженерүүд нь нотлон ярьж байна

Баримт 5

Холбогдох албан тушаалтан: Дарга А.Хүрэлшагай, Албаны дарга С.Энхтуяа

Тендер: “Замчлах систем бүхий програм хангамжид хаягийн зургийг суурилуулан турших” 10 000 000 төгрөгийн өртөг бүхий ажлыг шууд худалдан авалтаар хийсэн бөгөөд Юу Би Эл Групп ХХК гүйцэтгэгчээр шалгарсан. /2014/70 тоот гэрээ/

Тайлбар: Энэ ажилд нэр бүхий хэд хэдэн мэргэжлийн компани өрсөлдсөн бөгөөд Юу Би Эл Групп ХХК гүйцэтгэгчээр шалгарсан нь:

• Юу Би Эл Групп ХХК-ийн захирал Э.Золбаяр нь дарга А.Хүрэлшагайгийн дүү нь бөгөөд энэ компанийг сонгож шууд худалдан авалт хийсэн.
• Гэрээнд заагдсанаар ажил 2014 оны 06 дугаар сарын 26-нд эхэлж, 2014 оны 07 дугаар сарын 20-нд дуусахаар заагдсан боловч бүх шатны санхүүжилт шилжигдэж дууссаны хойно ажил шалгаж хүлээн авсан акт нь 2014 оны 09 дүгээр сарын 11-ний өдөр гарсан байна. Мэргэжлийн хэлтсийн дүгнэлт гарахаас өмнө санхүүг шилжүүлсэн нь журам зөрчсөн үйлдэл бөгөөд ашиг сонирхлын зөрчил харагдаж байна.
• Мэргэжлийн инженерүүдийн үзэж байгаагаар энэ төрлийн ажлыг заавал төсвөөс мөнгө гаргаж хийхгүйгээр бэлэн программ ашиглаад хөрвүүлэх боломжтой байна.

Баримт 6

Холбогдох албан тушаалтан: Дарга А.Хүрэлшагай

Тендер: 2014 онд “Газрын үнэлгээний төлбөр, татварын үнэлгээ тогтоох” ажлын тендер зарлаж БНСУ-ын хөрөнгө оруулалттай MKTRS ХХК шалгарсан.

Тайлбар: БНСУ-ын хөрөнгө оруулалттай MKTRS ХХК шалгарсан боловч дарга А.Хүрэлшагайгийн найзын компани болох Инжгеотех ХХК нь туслан гүйцэтгэгчээр албан бусаар энэ ажилд оролцож байгаа.

Инжгеотех гэх найзынхаа компанид А.Хүрэлшагай дарга юуны ч хамаагүй ажил өгч байгаа нь тендерийн хувь өндөр авдгийг харуулж байна

Баримт 7

Холбогдох албан тушаалтан: Дарга А.Хүрэлшагай

Тендер: Монгол улсын 2013 оны төсвийн тухай хуулийн 21.1.6-д тусгагдсан ҮОЗМДБ-ийг байгуулах ажлын хүрээнд улсын төсвийн санхүүжилтээр “ҮОЗМДБ-ийн системийг байгуулах ” 134 900 000 төгрөгийн өртөг бүхий ажлын тендер зарлагдсан бөгөөд Геомон Инженеринг ХХК гүйцэтгэгчээр шалгарсан. /2013/48 тоот гэрээ/

Тайлбар: Энэ ажлыг гүйцэтгэхээр тендерт шалгарсан ГеоМон Инженеринг ХХК-ийн захирал Б.Энхтүвшин нь А.Хүрэлшагайн найз нь. А.Хүрэлшагай дарга найз Б.Энхтүвшинтэйгээ 2014 онд ОХУ руу хуралд явсан бөгөөд зардлыг улсын төсөвт гадаад арга хэмжээний зардал байхгүй болсон гэдэг шалтгаанаар Б.Энхтүвшин захирал бүрэн гаргасан нь авилгал, ашиг сонирхлын гүн гүнзгий хэлхээ холбоотой гэдгийг харуулж байна

Дээрх ажлууд нь анх гэрээнд тусгагдсан хугацаанд хийгдээгүй бөгөөд нэмэлт гэрээнүүд байгуулсан ч өнөөдрийг хүртэл хийгдэж дуусаагүй, төсвийн мөнгө усны урсгалаар урсаж байгаа нь харамсалтай.

А.Хүрэлшагай дарга ажилтан, албан хаагчдаа сэтгэл санааны хувьд дарамт шахалтанд ажиллуулдаг бөгөөд 2015 оны 04 дүгээр сарын 23-ны өдөр агентлагийн 205 тоот хурлын танхимд хамт олны хурал хийж “Ер нь би ганцаараа л шалгагдах ёстой юм уу? Та нарыг бүгдэнг чинь цагдаад өгнө дөө, би ганцаараа усанд живэхгүй шүү” хэмээн ажилтнуудаа дарамталжээ. Энэ нь нэг удаагийн тохиолдол биш бөгөөд тэр бүү хэл эмэгтэй ажилтнууддаа ажлын байрны бэлгийн дарамт үзүүлдгийг баттай эх сурвалж нотлох баримтын хамтаар илэрхийлж байна.

Авилгал, ашиг сонирхлын зөрчилд автаж, газрын наймааг цэцэглүүлж, төсвийн мөнгийг үр ашиггүй зарцуулан, төрийн захиргааны албан хаагчдыг дураараа халж сольж байгаа агентлагийн дарга А.Хүрэлшагайг Ерөнхий сайд Ч.Сайханбилэг болон Барилга хот байгуулалтын сайд Д.Цогтбаатар ажлаас нь чөлөөлж хариуцлага тооцох цаг болжээ.

Эх сурвалж: Шуурхай.мн