Нийслэлд зэрлэг амьтан, ялангуяа чоно, буга зэрэг амьтад  орж ирэх нь сүүлийн жилүүдэд ховордсон. Буга бүр  үзэгдэхээ больсон. 1990-оос өмнө Богд уулын буга нийслэлийн төв талбайд хүртэл орж ирдэг байлаа. Харин саяхан нийслэлийн Баянзүрх дүүргийн нутаг дэвсгэр, 92 дугаар сургуулийн хашаанд нэгэн чоно орж ирсэн тул дүүргийн цагдаа, онцгой байдлын албан хаагчид шуурхай ажиллаж, хүн рүү дайрахаас  сэрэмжлэн буудаж аюулгүй болгосон юм. Үүнтэй холбогдуулан Монголын байгаль орчны иргэний зөвлөлийн тэргүүн С.Дамдинсүрэн “Зэрлэг амьтадыг шууд устгаж болохгүй, шаардлагатай бол нойрсуулах сумаар буудаж, шинжилгээ хийгээд ямар нэгэн өвчин эмгэггүй бол байгальд нь буцааж тавих хэрэгтэй. Нийслэлийн хэмжээнд цаашдаа зэрлэг амьтны хяналтын албатай болох шаардлагатай.  Бид 92 дугаар сургуулийн  хашаанд орж ирсэн чонын биед шинжилгээ хийлгэж байгаа. Шинжилгээний дүн хараахан гараагүй байна” гэлээ.

Б.Баяр

Эх сурвалж: Tumen.mn