Д.Одонцэцэг: Зах зээлийн нийгмийн шаардлага хангахаар чиг үүрэгтэй болсон

Д.Болормаа: Д.Очирбат дарга ирснээс хойш ажлын чиг үүрэг тодорхой боллоо

       Хөдөлмөрийн Эрүүл мэнд судлалын төвийн Мэргэжлийн өвчин судлалын газрын харшлын эмч Д.Одонцэцэг, Дүрс оношилгооны эмч Д.Болормаа нараас дараах тодруулгыг авлаа. Дашрамд дурдахад Хөдөлмөрийн эрүүл мэнд судлалын төв нь бүтэцийн шинэ зохион байгуулалтад ороод байгаа билээ. Тус байгууллага нь хөдөлмөрийн нөхцөлийг судлах, үнэлгээ дүгнэлт өгөх, ажлын байрны аюултай хортой хүчин зүйлийг багасгах, арилгах, арга хэмжээний талаар зааварчилгаа зөвлөмж өгөх, ажиллагсдад эрүүл аюулгүй зан үйлийг төлөвшүүлэх, мэргэжлээс шалтгаалсан өвчин хордлогыг оношлож, эрт илрүүлэх, эмчлэх, нөхөн сэргээж сувилах, урьдчилан сэргийлэх, хөдөлмөр зохицуулалт магадлал хийх, холбогдох байгууллага, мэргэжилтнүүдийг мэргэжил арга зүйн удирдлагаар хангах, хөдөлмөрийн нөхцөл болон мэргэжлээс шалтгаалсан өвчний судалгаа явуулдаг үндсэн чиг үүрэг бүхий улсын хэмжээнд үйл ажиллагаа явуулдаг Хөдөлмөрийн яамны харъяа төрийн үйлчилгээний байгууллага юм.

-Хөдөлмөрийн эрүүл мэндийн төвийн зарим удирдлага аснууд эмч нарт хувь хүний харилцааны үүднээс болж сахилгын арга хэмжээ авсан нь багагүй маргаан дэгдээж байсан. Энэ маргаан чухам юу болов?

-Д.Одонцэцэг: Өмнөх удирдлагуудын үед манай Хөдөлмөрийн эрүүл мэндийн төвийн дэд захирал, Мэргэжлийн хөгжлийн албаны дарга  нар удирдах ажлын ёс зүйгүй, мэргэжлийн ур чадваргүй, алдаа дутагдал гаргаж байхад бид чимээгүй сууж чадсангүй. Өөрсдөд нь хэлээд шүүмжлэл өрнүүлсэн. Тиймээс бидэнд ажлын байрны дарамт үзүүлсэн. Тэгэхээр нь бид хэвлэлийн хурал зарлаж, энэ тухайд нийтэд дэлгэсэн юм. Яагаад гэхээр энэ мэт алдаанаас болж манайхаар үйлчлүүлж байгаа өвчтнүүдэд хүртэл буруу сэтгэгдэл төрүүлж эхэлсэн. Ажлынх нь алдаа дутагдал, бурууг нь шүүмжилсэн хүмүүс ийн буруутан боллоо гэж хэвлэлд хандсан юм.

-Та нар ямар учраас шүүхэд хандсан юм?

-Д.Болормаа: Яагаад гэвэл манай дэд захирал Зулцэцэг эмч бид гурвыг дуудаж, улс даяар байгууллагынхаа нэр хүндийг унагаж, хамт олноо доромжиллоо гэсэн. Тэгээд бидэнд сахилгын арга хэмжээ авч, цалингийн 20 хувийг гурван сараар хасч шийтгэсэн. Тэгэхээр нь бид байгууллагаа муулж, хамт олноо доромжлоогүй. Зөвхөн хоёрхон хүний буруутай асуудлыг л ярьсан. Тиймээс энэ шийтгэлийн арга хэмжээ, тушаалыг зөвшөөрөөгүй, буцааж хүчингүй болгож өгөхийг шаардаж шүүхэд хандсан юм. Ингээд шүүхэд хандаад явж байтал манай удирдлага солигдоод шинээр Д.Очирбат дарга ирсэн. Д.Очирбат дарга бидний шийтгэлийн тушаалыг хүчингүй болгосон. Тэрээр би урьд өмнөх ийм зүйлтэй зууралдахгүй.  Харин байгууллага маань бүтэц зохион байгуулалтын хувьд нэлээд өөрчлөгдөж, шинэ арга барилаар ажиллах болно. Тиймээс та бүхэн хамтраад сайн ажиллах хэрэгтэй гэсэн.

-Тэгэхээр та бүгд гомдлоо татсан уу. Эсвэл хуучин удирдлагуудтайгаа зарга үүсгэсэн хэвээрээ юу?

-Д.Одонцэцэг: Тэртээ тэргүй бидэнд арга хэмжээ авсан тушаал хүчнгүй болчихож байгаа болохоор бид шинэ даргатай шинэ арга барилаар ажиллах гэж байж шүүхээр зууралдаад яахав. Нэгэнт бидэнд арга хэмжээ авсан удирдлагууд халагдсан учраас шүүхээс гомдлоо татсан.

-Та дээр шинэ даргатай шинэ арга барилаар ажиллах боллоо гэсэн. Чухам ямар өөрчлөлт гарч байна вэ?

-Д.Болормаа: Манай байгууллага өргөжиж байна. Урьд өмнө нэг жижигхэн эмнэлэг байсан бол өнөөдөр таван газар, дөрвөн хэлтэстэй болж, бодлого стратеги боловсруулдаг газартай болсон. Энэ мэтээр чиглэл чиглэлд газар хэлтэсүүд байгуулагдсан нь тодорхой чиг үүрэгтэй болж, өргөжиж байна. Эмч нар гэхэд л чиг үүргийнхээ дагуу л ажлаа хийнэ. Олон улсын байгууллагуудын хэмжээнд хүрч ажиллахаар өргөжиж байна.Байгууллага маань өргөжиж байхад бид ийм жижиг асуудлаар оролдоод яахав. Манай байгууллага шинэ оффистой болж, хуучин Хөдөлмөрин биржид байрлах болсноор ажиллах ая тух ч хангагдлаа. Шинэ удирдлагууд маань Хөдөлмөрийн сайдтай ажил хэргийн түвшинд ойлголцож, бараг хоёр тэрбум төгрөгийн хөрөнгө оруулалт хийж ажиллах орчноо сайжруулсан юм. Одоо байгаа эмнэлэг нь зөвхөн оношлогоо, үзлэгийн тусламж үйлчилгээний зориулалтаар ажиллана. Ер нь бол ажил хийх урам зориг дүүрэн болсон. Манайх хуучин бол Санхүүгийн хэлтэс, Мэргэжлийн өвчин судлалын алба, хөдөлмөрийн нөхцөл судлалын гэсэн гурван албатай байсан. Харин Д.Очирбат дарга ирснээс хойш нэлээд өргөжиж, ажлын чиг үүрэг ч тодорхой болсон. Цар хүрээ өргөжиж, илүү тодорхой болоод байна. Өнөөгийн зах зээлийн нийгмийн шаардлага хангахаар чиг үүрэгтэй болсон.

Хөдөлмөрийн Яамны харьяа Хөдөлмөрийн эрүүл мэнд судлалын төвийн дарга 

С.Баяр