Гоо сайхны мэс засал, өвөрмөц будалт, ганган хээнцэр хувцас гоёлоороо үргэлж олны анхаарлыг татсаар ирсэн дуучин Ч.Уранхолбоо буюу Ану энэхүү тайлбарыг хийжээ. Олон улсын сүлжээний байгууллага болон томоохон салон, гоо сайхны эмнэлэгтэй хамтарч ажилладаг гэх дуучин бүсгүйн тансаг амьдрал, үлгэрийн гэмээр өөрчлөлт охид хүүхнүүдийг ч багагүй атаархуулдаг.
“Амьд барби” хоч зүүгээд байгаа дуучин Ч.Анугаас олон хүн “Гоо сайхны мэс заслуудаа хаана, ямар үнээр хийлгэсэн бэ”, “Төрснийхөө дараа яаж ийм хурдан, бас гоё сайхан бие галбиртай болох вэ”, “Ямар брэндийн будаг шунх, хувцас гоёл хэрэглэдэг вэ” гэж асуудаг ч тэрбээр аль болох илэн далангүй зөвлөж суудаг гэсэн. Гэтэл жил гаруйн өмнөөс эхлэн түүнтэй ихэд дотночлон харьцаж чамгүй зөвлөгөө авсан нэгэн эмэгтэй нүүрэндээ алтан утас хийлгээд саажилт үүссэнийхээ бурууг дуучин Ч.Ануд тохох гэж оролджээ.
Харин дуучин бүсгүй түүнийг “Алтан зүү” эмнэлгийн солонгос эмчтэй холбож өгснөөр барахгүй мөнгө төгрөгийг нь хүртэл зээлээр тохиролцсон болохоо мэдэгдэж “Тэр эмэгтэй өмнө нь арав гаруй удаа нүүрэндээ мэс ажилбар хийлгэж байсан юм билээ. Чухам алтан утас суулгаснаас болов уу, аль эсвэл тэр олон мэс заслаас нь болж саажилт үүссэн үү гэдгийг албан ёсоор тогтоолгоно. Намайг жирэмсэн болсноос хойш төрөх хүртэл минь олон нийтийн цахим сүлжээгээр доромжиллоо. Тиймээс би шүүхэд хандаж, гэм буруугүй гэдгээ тогтоолгоно. Би хоёр хүүхдийн эх хүн, бусдыг хуурч мэхлэх шаардлага байхгүй” хэмээн ярьжээ.
Б.Содон
