“Даварсаар даварсаар Дагвын оронд” гэдэг үг “Samsung C&T” гэдэг группт сүрхий сайхан зохих янзтай. Хөнгөн утгаараа бол дэлхийд алдартай сүмогийн их аварга Асашёорю Дагваа манай улсын иргэн тул энэ зүйрлэл сайхан зохиж байна. Харин ноцтой утгаараа бол хөнгөнөөсөө ч илүү зохино гээч.
“Samsung C&T” грруп Монголын хамгийн том хөрөнгө оруулалттай төслүүдээс башир аргаар их хэмжээний мөнгө хусч амташжээ. Амьтантай зүйрлэвэл хортой паразит гээд хэлчихэж болох “Samsung C&T” хэд хэдэн томоохон төслүүд дээр ажиллаж, манай улсыг шимсээр байна.
Монголын бүхий л томоохон төслүүдэд гар дүрж байгааг эхнээс нь дурдвал Тавантолгойн төмөр зам барих ажил, Хөшигтийн хөндий дэх олон улсын нисэх онгоцны буудал, саяхан үндэсний гэх тодотголтойгоор нээлтээ хийсэн Шангри-Ла Улаанбаатар зочид буудлын ажил гэх мэт. Хамгийн гол нь улсын хөрөнгийг шимүүлэх боломжийг эрх баригчид олгож байгаа юм.
Тавантолгойн ордыг ашиглахдаа зүүн болон урд чиглэлд төмөр зам барихаар болсон. Урд чиглэлд баригдаж байгаа Тавантолгой-Гашуунсухайт чиглэлийн 267 км төмөр замын далангийн ажлыг “Чингис бонд”-оос 200 сая доллараар санхүүжүүлсэн бөгөөд паразит “Samsung C&T” компани гүйцэтгэж байна. Гүйцэтгэж байгаа ч гэж яг үнэндээ бол энэ их хэмжээний мөнгөөр санхүүжүүлсэн төсөл 2013 онд эхэлсэн ч одоо зогсчихсон байгаа.
“Samsung” компанийн төмөр замын ажил 51.4 хувь дээрээ очоод гацжээ. Тус компани туслан гүйцэтгэгч 13 компанидаа 65 сая долларыг хөрс, шорооны ажлын 85 хувийг гүйцэтгэсний төлөө төлжээ. Тэгээд мөнгө дуусчихсан гээд суучихсан. Үлдсэн 135 сая долларыг хаашаа хийсэн гэдгээ “хэнд ч” хэлээгүй.
Улс төрчидтэй ойр зарим эх сурвалж “Samsung” компанийн их хэмжээний мөнгө залгичихаад юу ч хийхгүй суугаад байгаагаас болоод Тавантолгойн төслийн ажлыг УИХ-аар хэлэлцүүлэхгүй гацааж байгаа хэмээн мэдээлж байна.
Хүүхдийн паркын талбайгаас булаасан гэх маргаантай эхэлсэн Шангри-Ла Улаанбаатар тансаг зэрэглэлийн зочид буудал энэ сарын эхээр сүр дуулиантайгаар нээлтээ хийсэн.
Шангри-Ла Улаанбаатар зочид буудлыг үндэсний томоохон бүтээн байгуулалт хэмээн тунхаглаж байсан цаг саяхан. Гэтэл MCS группын албан ёсны веб сайтад Шангри-Ла Улаанбаатар зочид буудлын хөрөнгө оруулалтын 70 хувийг “Samsung C&T корпораци, үлдсэн 30 хувийг MCS группын салбар “М-Си-Эс Проперти” ХХК эзэмшдэг хэмээн бичжээ. Мөн бүтээн байгуулалтыг Samsung C&T Mongolia компани хариуцсан гэсэн байна.
Эндээс Монголын томчууд үндэсний бүтээн байгуулалт хийх нэрээр хотын төвд газар авч, хүүхдийн тоглоомын талбайгаас “булаасан” газраа харийн томоохон группт эзэмшүүлдэг юм биш үү гэсэн хардлага төрж байна.
Тэгээд ч MCS группын “Энержи Ресурс” компани Тавантолгойн төмөр замын төслийг шижүүлэхдээ Samsung CT компанийг ерөнхий гүйцэтгэгчээр сонгосон нь тус групп “Samsung C&T корпорацитай хэр дотно гэдгийг харуулж чадна.
“Samsung C&T” engineering & Construction гэдэг Солонгосын групп дээрх ажлуудыг хийж байна. Тэгсэн хэрнээ Монголын томоохон төслүүд дээр ашигласан нэр нь анхаарал татав.
Засгийн газрын 2014 оны 53 дугаар тогтоолын хавсралт.
Эх сурвалж: http://www.legalinfo.mn/annex/details/6235?lawid=9800
Таван толгойн төмөр зам барих гэрээн дээр Samsung CT болон охин компани гэгдэх “Эс Си Ти И Си Эм” ХХК гэдэг нэр ашигласан бол Шангри-Ла Улаанбаатар кочид буудлыг барихад Samsung C&T Mongolia гэдэг нэрийг ашиглажээ.
Гэтэл интернэтээс хайгаад үзвэл ийм компаниуд байдаггүй гэдэг нь нотлогдоод байна. Samsung CT, “Эс Си Ти И Си Эм” ХХК болон Samsung C&T Mongolia компаниуд Монголын хаана байршилтай, хэдэн хүн ажилладаг, хэн эдгээр “салбаруудыг” хариуцдаг талаар ямар ч мэдээлэл байхгүй. Олон улсын Вloomberg.com сайт ч Samsung C&T Mongolia-гийн талаарх мэдээлэл хэнд ч тодорхой бус хэмээн мэдээлсэн байх юм.
Түүнчлэн “Samsung C&T” engineering & Construction албан ёсны веб хуудсан дээрээ Монголд хэрэгжүүлж буй томоохон төсөл зөвхөн Шангри-Ла Улаанбаатар зочид буудал хэмээн бичсэн байна. Яагаад 200 сая долларын санхүүжилттай, Монголын засгийн газартай хийсэн гэрээг гүйцэтгэж буйгаа олон улсад өөрсдийгөө сурталчлахаар тавиагүй юм бол?
Энэ нь нь Samsung CT болон Samsung C&T Mongolia компаниуд хуурамч нэр зээлдэгчид үү гэж асуухад хүргэлээ.
Д.Идэр
www.24tsag.mn
