Д.Нацагдоржийн нэрэмжит Улаанбаатар хотын нийтийн төв номын сан энэ долоо хоногийг дуустал “Дэлгэцгүй долоо хоног” аяныг эхлүүлээд байна. Хичээл сургалт завсардсан эдгээр өдрүүдэд хүүхдүүдийн цахим хэрэглээг зохистой болгох, бүтээлч сэтгэлгээг хөгжүүлэх, унших соёлыг дэмжих зорилгоор уг аяныг зохион байгуулж буй гэнэ. Аяны хүрээнд хүүхэд, залуус төдийгүй гэр бүлийн хамтын оролцоог нэмэгдүүлэх олон талт арга хэмжээ өрнүүлэх аж. Тухайлбал, “Ном бол миний дэлгэц” уншлагын өдөрлөг, “Дэлгэцээ унтраа, өөрийгөө асаа” гар зураг болон эсээ бичлэгийн уралдаан, гэр бүлийн арга хэмжээ, зохиолч, уншигчдын уулзалт “Аймшигтай, бүтээлч хэллоуины үдэшлэг” зэрэг сонирхолтой үйл ажиллагаа багтжээ. Эдгээр нь уншигчдыг цахим хэрэглээнээс түр ч болов ангид байлгах, номын шидэт ертөнцөөр аялуулах, гэр бүлээрээ чанартай цагийг өнгөрүүлэх боломжийг бүрдүүлж буйгаараа онцлогтой.