“Цэвэр агаар сан”-гийн мөнгийг хувьдаа завшсан хэргээр тус сангийн захирал асан Н.Хүрэлсүх, Ерөнхий нягтлан бодогч М.Хулан тэргүүтэй 11 хүнд холбогдох хэргийн анхан шатны шүүх хурал өнгөрсөн оны хоёрдугаар сард Дүүргийн эрүүгийн хэргийн шүүхэд болж байсан. Тодруулбал, тэднийг 10 орчим тэрбум төгрөг хувьдаа ашигласан, бусдад шилжүүлсэн хэргээр Эрүүгийн хуулийн 263.2 буюу албан тушаалын байдлаа урвуулсан, 150.3 буюу аж ахуйн нэгж, байгууллага, иргэдийн өмчийг завшсан гэх хэрэгт буруутган шалгаж, гэм буруутайг нь тогтоож 1-8 жилийн хорих ял ногдуулж улсад учруулсан хохирлыг нь төлүүлэх, тодорхой хэмжээний хөрөнгө хураах ял оноож байсан. Тэгвэл дээрх нэр бүхий хүмүүст холбогдох хэргийг АТГ-аас яллах дүгнэлт үйлдүүлэхээр прокурорт шилжүүлээд байгаа аж.
Өөрөөр хэлбэл, тэдний хэрэг дутуу шалгагдаж, гэмт хэргийн нэг үйлдэл нь үлдээд байсан байна.
Тэд нэгэн компанийн данс руу 30 гаруй сая төгрөг шилжүүлсэн нь ийнхүү илэрсэн гэсэн үг. Түүнчлэн“Тара” компанид 170 сая төгрөг шилжүүлсэн нь ч бас хууль бус үйлдэл болжээ. Учир нь эдгээр шилжүүлгийн мөнгөнөөс М.Хулан нар нь бэлнээр гаргуулан хувьдаа авч байжээ. Уг нь эл хэргийг АТГ-аас шалгаж яллах дүгнэлт үйлдэн прокурорт өгсөн боловч уг хэргийг хэрэгсэхгүй болгосныг нь ажлаа аваад удаагүй байгаа Ерөнхий прокурор сэргээн шалгаж шүүхэд шилжүүлэхээр болсон байна. Ямартай ч анхан шатны шүүхээс ял аваад байгаа Н.Хүрэлсүх нар нь давж заалдах шатны шүүхэд гомдол гаргахаар зэхэж буй аж. Хэрвээ давж заалдах шатны шүүх тэдний гомдлыг хүлээн авбал хэргийг нэмэлт мөрдөн байцаалтад буцааж анхан шатны шүүхийн шийдвэрийг өөрчилж хэргийг нэгтгэн шалгах магадлал бий аж.
Түүнчлэн анхан шатны шүүхээс долоон жилийн ял сонсож жирийн дэглэмтэй хорих ангид эдлэж буйМ.Хулангийн өмгөөлөгч Т.Мэндсайхан, Оюунбилэг болон төрсөн ах М.Цолмон нар М.Хуланд оногдуулсан ял хүндэдсэн. Хэдийгээр энэ хэргийг олон оролцогчтой бүлэг хэрэг гэж тооцон, холбогдох этгээдүүдэд ял ногдуулсан боловч учирсан хохирлын ихэнх болох 4.2 тэрбум төгрөгийг М.Хулангаар төлүүлэх болсон нь алдаатай шийдвэр гэж үзэж буйгаа илэрхийлж байсан. Түүнчлэн өнгөрсөн оны аравдугаар сарын 16-нд Улсын Дээд шүүхийн хяналтын шатны эрүүгийн хэргийн хуралдаанаар нэр бүхий 11 хүнд холбогдох эрүүгийн хянан хэлэлцэж анхан шатны шүүхийн шийтгэх тогтоол, давж заалдах шатны шүүхийн магадлалын зарим нэг зүйлд нь өөрчлөлт оруулж, оногдуулсан ялыг тодорхой хэмжээгээр хөнгөлж байсан. Тодруулбал, тус шүүх Н.Хүрэлсүхийг төсвийн хөрөнгийг зориулалтын бусаар зарцуулсан хэмээн үзэж, Эрүүгийн хуулийн 273 дугаар зүйлийн 273.2 дахь хэсэгт зааснаар яллах дүгнэлт үйлдэж ирүүлсэн хэргийг хэрэгсэхгүй болгож байсан. Мөн Н.Хүрэлсүхэд Эрүүгийн хуулийн 150 дугаар зүйлийн 150.3-т зааснаар оногдуулсан найман жилийн хорих ялыг хөнгөрүүлж, биечлэн эдлэх ялыг долоон жилээр тогтоосон. Харин Ерөнхий нягтлан бодогч асан М.Хуланд долоон жилийн хорих ял ногдуулсан шийтгэх тогтоолыг хоёр жилээр хойшлуулахаар давж заалдах шатны шүүх шийдвэрлэснийг хүчингүй болгож байсан.
Өөрөөр хэлбэл, М.Хуланд шүүхээс ногдуулсан долоон жилийн хорих ялыг биечлэн эдлэх ёстой гэж үзсэн юм. Тэгвэл энэ удаа тэд дахин шүүхийн өмнө буруу зөвөө дэнслүүлэхээр болсон нь дээрх ихээхэн хэмжээний мөнгөтэй холбоотой аж.
Тус санд улсаас жил бүр агаарын бохирдлыг бууруулахад их хэмжээний мөнгө төсөвлөдөг бөгөөд олон улсын байгууллагуудаас цөөнгүй төсөл хөтөлбөрүүд хэрэгждэг. Тухайлбал, жилд Цэвэр агаарын санд улсаас 30 гаруй тэрбум төгрөг төсөвлөж олгодог бол гадаадын байгууллагуудын томоохон төсөл хэрэгжиж байдаг гэнэ.
Түүнчлэн улсын нэгдсэн төсвөөс төвлөрүүлсэн хөрөнгөөс гадна хандив, буцалтгүй тусламжийн орлогын дийлэнх нь энэ санд төвлөрдөг байна.
Тэгвэл энэ их мөнгө төвлөрдөг эргэлт ихтэй газрууддаа холбогдох байгууллагууд анхаарлаа хандуулах хэрэгтэй байна. Учир нь үе үеийн удирдлагууд нь дээрх хэмжээний мөнгө идэж уугаад байх юм биш биз гэсэн хардлага нийгэмд байгаа юм.
24tsag.mn
