Монголчууд УИХ-ын гишүүн С.Баярцогтын "мартамхай" зангийн буянаар анх удаа "оффшор" гэх үгтэй танилцснаас хойш багагүй хугацааг элээжээ. Гадны улсад нууц данс нээж, түүндээ их хэмжээний мөнгө байршуулчихаад ор тас мартчихсан түүнийг өнөө цагийн төрийн тэргүүн "бай"-ндаа онилсон нь Ерөнхийлөгч Ц.Элбэгдоржийг энэ долоо хоногийн "гол дүр"-ээр ямар ч эргэлзээгүй нэрлэхэд хүргэв. Ер нь ганц С.Баярцогт гишүүн ч биш түүнтэй ижил оффшор данстай байж болзошгүй манай улсын 49 иргэнийг Олон улсын эрэн сурвалжлах сэтгүүлчдийн консерциумаас өнгөрсөн долоо хоногт нэрлэсэн нь одоо ч дэлхий нийтийн анхаарлын төвд байна.
Харин эрхгүй дэлхий нийтээрээ чих тавьж байгаа юм болохоор манай хууль, хяналтынхан нэрээ бодсон уу яасан өнөөх өрөөлд хэлэх нь битгий хэл өөрөөсөө хүртэл нуусан тэрхүү нууц данс нь илэрсэн нөхдийг ямартай ч шалгаж эхэлсэн сурагтай. Дээр нь манай Ерөнхийлөгчийн орон нутагт ажиллаж байх үедээ индер дээрээс хэлсэн үг нөлөөлсөн эсэхийг мэдэхгүй ч оффшор данстнуудын анхдагч гэж хэлж болох С.Баярцогтыг ирэх сонгуульд нэр дэвшүүлэхгүй байхыг уриалсан нь үнэхээр гэнэтийн бөгөөд зочир мэдэгдэл байлаа. Одоо түүний үг хэр үнэн, "бай"-ндаа хэр жинтэй очихыг зөвхөн цаг хугацаа л харуулах биз ээ.
Гэхдээ бүгдийг цаг хугацаанд даатгахаасаа өмнө Монгол Улсын ерөнхийлөгч Ц.Элбэгдоржийг өнгөрсөн бямба гарагт Дархан-Уул аймагт ажиллах үеэрээ иргэдийнхээ асуултад, ялангуяа "оффшор" дансны талаар ямар үг хэлснийг уншигчдадаа сануулах нь зөв байх. Мэдээж Ерөнхийлөгч маань өнгөрсөн хугацаанд төрийн тэргүүнээр ажиллахдаа ямар ажлыг хийж, юуг дутуу үлдээснээ тайлагнасан нь ойлгомжтой. Үүнийг түр орхиод онцлон төрийн тэргүүнээ бүх нийтээрээ шууд сонгодог ард түмэн хэчнээн мэргэн, асуудлын голыг олж хөндөж чаддагийг харуулсан хэдхэн өгүүлбэрт анхаарлаа хандуулцгаая. Өөрөөр хэлбэл, Ерөнхийлөгч Ц.Элбэгдоржийн хэлсэн "Иргэд оффшор данстай хүмүүсийн хөрөнгийг нь хурааж, хариуцлага тооцох хэрэгтэй гэсэн санал гаргаж байгаа иргэдтэй санал нэг байна. С.Баярцогт бол төрд гай болж байна. Би түүнд сонгуульд нэр дэвших хэрэггүй, шалгуул гэж хэлсэн" гэх хэдхэн үг, өгүүлбэр өвсөнд тавьсан гал шиг л цахим ертөнцөд түгж, тэр хэрээр олон нийт анхааралтай ажиглаж суугаа нь лавтай.
Тэгвэл УИХ-ын гишүүн С.Баярцогт болон бусад "зовлон" нэгтнүүдийг нь онилсон Ерөнхийлөгчийн "бай" үүгээр дууссангүй. Уржигдар цахим ертөнцөд тун сонирхолтой мэдээлэл тавигдав. Өөрөөр хэлбэл, нэр бүхий хүмүүс болон УИХ-ын гишүүдийн утас руу 12345 гэсэн дугаараас дуудлага иржээ. Энэхүү дуудлага нь Ерөнхийлөгч байсан бөгөөд тэрбээр “С.Баярцогтыг нэр дэвшүүлж болохгүй гэж би хэлсэн” гэх мэтээр ярьж эхэлсэн гэх юм. Хамгийн сонирхолтой нь энэхүү дуудлага гадаадаас буюу БНХАУ-аас ирсэн гэдгийг хүмүүс онцолж байна. Зарим нь бүр Шанхайн хэвлэлийн төлөөлөгч байсан гэх мэтээр ярьж байгаа аж. Энэ ямар учиртай дуудлага байсан, яагаад Хятадаас Ерөнхийлөгчийн хоолойгоор ярьсан талаар албаны хүмүүс тодруулахаар ажиллаж байгаа гэнэ лээ. Ямартай ч төрийн тэргүүний хэлсэн үг, онилсон “бай”-ндаа хэр жинтэй очихыг цаг хугацаанд л даатгахаас өөр яах билээ.

Эх сурвалж: