УИХ-ын сонгуулийн 19 дүгээр тойрогт бие даан нэр дэвшигч Тордайн Ганболдтой ярилцлаа.
-ТА ЦЭЛ ЗАЛУУХАН БАЙХДАА ТӨРИЙН ӨМЧИТ ДАРХАНЫ ТӨМӨРЛӨГИЙН ҮЙЛДВЭРИЙН ГҮЙЦЭТГЭХ ЗАХИРЛААР ТОМИЛОГДОЖ БАЙСАН. ТУХАЙН ЦАГ ҮЕД АМЖИЛТ ДАГУУЛСАН ОЛОН АЖЛЫГ ХИЙСЭН БАЙДАГ. ТА ДАРХАН-УУЛ АЙМГИЙГ ЯМАР БАЙГААСАЙ, ЯМАР ЧИГЛЭЛ ДАВАМГАЙЛЖ ХӨГЖӨӨСЭЙ ГЭЖ БОДДОГ ВЭ?
-Дархан хот бол Социалист системийн орнууд болон БНМАУ-ын хамтын ажиллагаанд суурилан аж үйлдвэрийн цогцолбор болох зорилгын хүрээнд 1961 онд байгуулагдсан Монгол Улсын гурав дахь том хот. Зөв төлөвлөлттэй гарч ирсэн Дархан хотыг/Дархан-Уул аймаг/ аж үйлдвэрийн цогцолбор хот болон хөгжөөсэй гэж хүсдэг. Тэрхүү хөгжилд хүрэхэд өгөгдөл суурь нь байна. Малын түүхий эдийг боловсруулах үйлдвэр, Дархан Сэлэнгийн сав газарт байдаг Төмөртэй, Төмөр, Толгой, Хуст Уул зэрэг төмрийн хүдрийн орд газрыг түшиглэсэн төсөл хэрэгжүүлэх боломжтой. Уг орд газруудыг би санаачилж тэмцэл өрнүүлж, гурван жил шүүхээр явсны эцэст Дарханы Төмөрлөгийн үйлдвэрт 100 хувь авч чадсан. ТЭЗҮ-ийг бүрэн боловсруулж, уурхайг ашиглалтад оруулж өгсөн.
Түүнчлэн Монгол Улсын үндсэн дэд бүтцийн суурь байх ёстой хар металлургийн цогцолбор суурь түүнээс салаалсан олон боловсруулах үйлдвэр байгуулах ёстой. Экспортын чиг баримжаатай, эдийн засагт үр өгөөжөө өгсөн төсөл хэрэгжээд эхлэхээр бүс нутгийн иргэдийн амьдралын төвшин, орлого дэлхийн жишигт хүрэх боломжтой юм.
-ТУХАЙН ТОЙРГООС СОНГОГДДОГ ҮЕ ҮЕИЙН ГИШҮҮД, ТҮҮНИЙ ОЙР ДОТНЫНХОН АЖИЛ ХИЙСЭН НЭРЭЭР ТӨСВИЙН МӨНГӨНӨӨС АШГАА ХУВААЖ АВДАГ ГАЖ ТОГТОЛЦООГ ЗАСАХ ЯМАР БОЛОМЖ БАЙНА ВЭ?
-Эдийн засгийн эрүүл тогтолцоо байж хөгжил зөв гольдирлоороо явна. Ажил хийх нэрээр тухайн бүсийн иргэдээ төлөөлж байгаа хүн нь ашгаа авдаг гаж тогтолцоо газар сайгүй нутагшаад удаж байна. Нийтийн эрх ашигт нийцсэн томоохон төслийг хэрэгжүүлэх нэрээр намын харьяалалд орсон, эрх ашиг нэгтэй хүмүүс өөрийн бизнесээ болгон ашигладаг.
УИХ-ын гишүүн гэдэг нь тухайн бүс нутгийн иргэдийн эрүүл , аюулгүй орчинд амьдрах хууль эрх зүйн таатай нөхцөлийг бүрдүүлэхийн төлөө ажиллах ёстой болохоос тэдэнд зориулагдсан төсвийн мөнгөнөөс ашгаа аваад тойрон хүрээлэгчид, найз нөхөд, ах дүүдээ хуваарилж өгдөг аж ахуйн ажилтан биш. Энэ олон жилийн хэвшмэл гаж тогтолцоог өөрчлөхийн төлөө ажиллана.
-ЭРҮҮЛ ЭДИЙН ЗАСГИЙН ТААТАЙ ОРЧИН ГЭЖ ТА УДАА ДАРАА ОНЦОЛЛОО. ТИЙМ ТААТАЙ ОРЧИН БҮРДЭЭСЭЙ ГЭСЭН ХҮСЭЛ ОЛОН НИЙТЭД БАЙХ Ч ХЭРЭГЖҮҮЛЭХ ДААНЧ УДААН ЮМ?
-Зах зээлийн жамаараа явах асуудлыг санаатайгаар гажуудуулахаар эдийн засгийн таатай орчин бүрдэхгүй. Нийтийн тусын тулд хэрэгжүүлэх томоохон төслийг хэрэгжүүлэхдээ санхүүгийн сахилга баттай, төсвийн зарцуулалтын олон нийтийн чанга хяналттай байх ёстой. Түүнээс гадна цаг үетэйгээ уялдсан техник эдийн засгийн үндэслэл чухал.
Тухайн бүс нутгийн иргэдийн итгэл хүлээж, төрд төлөөлж буй УИХ гишүүн макро эдийн засгийн эерэг өөрчлөлтүүдийг бүрдүүлэхийн төлөө ажиллах ёстой. Би энэ л зарчмыг баримтлан ажиллана. Аж ахуйн ажлыг ашиг унагааж хийхийг хэрхэвч хүлээн зөвшөөрөхгүй, тийм зүйл байх ч ёсгүй. Ард иргэд, аж ахуйн нэгжүүд нь өөрсдөө эдийн засгийн эрэлт нийлүүлэлтийнхээ жамаар хийж бүтээх эрх зүй, эдийн засгийн боломжийг бүрдүүлэхийн төлөө ажиллана.
-ТАНЫ ЦААШДЫН АЖИЛД АМЖИЛТ ХҮСЬЕ.
