Сонгуулийн сурталчилгааны ажиллагаа эхэлж, нэр дэвшигчид гарааны зурхай дээрээс хөдөллөө. Улс төрийн хоёр том хүчин МАН, АН-ын нэр дэвшигчд өнгөн хэсэгт хөдөлж байгааг хэвлэлүүд онцолж байгаа ч бусад нам эвсэл, бие даагчдын зүгээс ч өнгөн хэсэгт яваа нөхдийг дурдаж байна.

Цагтаа АН-ын өнгө зүс, нүүр царай болж явсан бэлтэй бол бэлтэй, хөлтэй бол хөлтэй нөхөд бие даан нэр дэвшиж байгаа. Ийнхүү АН-ын лидерүүд гэж болох нөхөд бие дааж байгаа нь их тулааны өмнө илд ч үгүй зогсож байгаа С.Эрдэнэ даргадаа маш том хохирол учруулахаар харагдана. Тодотговол, Н.Алтанхуяг бие дааж, Б.Дэлгэрмаа өөр эвслээс өрсөлдөхөөр болж, Т.Хасбаатар, П.Галиндэв нарын аль нь ч дурын тойрогт ялалт байгуулдаггүй юм гэхэд АН-аас нэр дэвшигчээ шууд татаж унагаана. Ялах магадлал ч бий.

Нөгөө талаас буюу МАН-аас Н.Номтойбаяр хоёр удаа ялалт байгуулсан тойрогтой, өөрийн гэсэн дэмжигчидтэй. Тэрээр Хан-Уул дүүрэгт бие даан нэр дэвшихээр болсон ч “Мөрдөгчийг дарамталсан” гэх үндэслэлээр таслан сэргийлэх арга хэмжээ авчихлаа. Мөн мандат авч чадаагүй ч бие даан нэр дэвшиж байгаа хүчтэй өрсөлдөгчид олон байна. 

Тэгвэл бие даагчдын армиас Дархан-Уул аймагт бие даан нэрээ дэвшүүлсэн “Алтан Дорнод”-ын захирал Т.Ганболд, мөн бие даан нэр дэвшиж байгаа Н.Номтойбаяр нарын хувьд яах аргагүй ялалт байгуулна гэдэгт иргэд олон нийт итгэлтэй байна. Хамгийн гол нь нам эвсэл харгалзахгүй, тэдний барьцаанд оролгүй нэрээ дэвшүүлж байгаа туршлагатай, мэдлэгтэй боловсролтой залуустаа иргэд олон нийт дэмжлэг үзүүлэхээ ч илэрхийлжээ.