Өнгөрөгч парламентад УИХ-ын нэр бүхий 49 гишүүн ЖДҮХС-гаас эрх мэдэл, албан тушаалаа урвуулан ашиглаж олон тэрбумын зээл авсан хэрэгт холбогдсон. Харин тэдний 15 нь цагаадаж дөрөв нь шүүхээс ял сонссон. Гэвч бусад нь ямар үндэслэлээр хуулийн байгууллагынхны хараанаас мултарсныг манай сурвалжлах хэсэг цувралаар хүргэж буй билээ.
Энд нэг зүйлийг онцлоход, олон түмний хоолноос дундалж, хэргээс мултран өнөөдөр эрх чөлөөтэй яваа гишүүдийн олонхийнх нь хэлдэг ганц л үг бий. Энэ нь “Тойрогтоо ажлын байр нэмэгдүүлэхийг зорьсон, тойргийн сонгогчдоо бодлогоор дэмжсэн” гэдэг тайлбарыг өгдөг. Гэвч төслүүд дотор санхүүжилтээ зориулалтын бусаар зарцуулсан, зээлийн хөрөнгөөр өндөр хүүтэй өр зээлээ хаасан, автомашин авсан, хувь хүмүүст шилжүүлсэн зэрэг зөрчил удаа дараа илэрснийг АТГ-аас тухайн үед мэдээлж байсан. Гэтэл эл хэрэгт нэр холбогдсон гишүүдийн зарим нь нарсанд, дийлэнх нь наранд, хэсэг бүлэг нь төрийн дээд албан тушаалд суугаа нь нийгэмд хардлага төрүүлж байна.
Энэ удаад УИХ-ын дарга Г.Занданшатарын ЖДҮХС-д арван компани “шахаж” зургаан зээл авсан ч өнөөдөр төрийн ордны зөөлөн сэнтийдээ ЯАГААД заларсаар байгааг онцлох болно.
Тэрбээр хамгийн олон буюу арван компанийг ЖДҮХС-д “зуучилж” ийм тооны компанийг зээлд хамруулахаар албан тушаалаа ашигласан байна. Өөрөөр хэлбэл, ЖДҮХС-д төсөл хүргүүлсэн “Асрал”Эмийн үйлдвэр” , “Дүүрэн гэгээ” “Путь” “Хөх цэнхэр нуур” “Жигүүр богд” “Кайф тест” “Үлэмж номин” “Эрдэнэс” “Ди Жи Монгол”ХХК-иуд түүнтэй холбогдож буй юм.
Эдгээр газраас “Асрал” “Эмийн үйлдвэр” “Дүүрэн гэгээ” ХХК-ийг А/88 тоот тушаалд багтааж зээл олгосон байна. Ингээд ЖДҮХС-гийн Төрийн банк дахь 100900037019 данснаас 2018 оны зургадугаар сарын 11-нд “Дүүрэн гэгээ” ХХК руу 200 сая, долдугаар сарын 3-нд “Эмийн үйлдвэр”ХХК руу 1.2 тэрбум төгрөг, наймдугаар сарын 17-нд “Асрал” ХХК руу 1.4 тэрбум төгрөгийг тус тус “Зээл олгов” гэсэн утгатайгаар шилжүүлсэн байна. Энэ гурван компанийн авсан зээл нийлээд 2.8 тэрбум төгрөг болно. Мөн ХХААХҮ-ийн сайдын А/141 тоот тушаалаар ЖДҮХС-гийн Төрийн банк дахь 100900037019 данснаас 2018 оны есдүгээр сарын 19-нд “Путь” ХХК-д 300 сая, есдүгээр сарын 21-нд “Хөх цэнхэр нуур” ХХК руу 200 сая шилжүүлсэн байна. Харин бусад газрууд нь Монголбанкны зээлийн мэдээллийн санд “Муу” үнэлгээ бүхий бүртгэлтэй, эсвэл их хэмжээний зээлийн үлдэгдэлтэй гэх мэт олон янзын шалтгаанаар зээлэнд хамрагдаж чадаагүй гэх.
Тухайн үед мань хүн У.Хүрэлсүхийн танхимд ЗГХЭГ-ын даргаар ажиллаж, “гал тогоог" нь барьж ирсэн гол хүн гэхэд болно. Ер нь тэр үе үеийн Засгийн тэргүүнд урваж шарваж, өөртөө ашигтай нүүдлийг тун ч гарамгай хийж чаддагаараа улс төрийн хүрээнийхний дунд алдартай. Ямар сайндаа л С.Батболдын Засгийн газрын үед Гадаад харилцааны сайдаар ажиллаж байсан учир Ерөнхий сайд асан Ж.Эрдэнэбатын эсрэг ажиллахгүй байх гэсэн улс төрийн хүрээнийхний таамаглалыг няц дарж, одоогийн “ 37-гийн бүлэглэлд” багтсан нь тухайн үед олны гайхшралыг төрүүлж байсан. Тиймдээ ч Ж.Эрдэнэбатын танхимыг унагаж, УИХ-ын даргын суудлаар “шагнуулж” байх вэ дээ. Харин ангийн нөхөд нь түүнийг нэг хэсэг "нөхрөөсөө урвасан" хэмээн шивэр авир хийцгээж байв. Гэвч цаг цагаараа байдаггүй гэж ийнхүү хоёр дахь удаагаа УИХ-ын даргын зөөлөн сэнтийд тухлан сууна.
Ер нь тэр ямар ч асуудлаас хуурай гарах овжин мэхийг яаж ийж байгаад олдог л хүн. Ганц жишээ дурьдахад, “Хадгаламж” банкнаас дутсан 14 тэрбум төгрөгийн хэрэгт нэр нь холбогдсон байдаг. Дээрх хэргийг үйлдсэн гэх Ц.Чимэдцэрэнг ял авахад тухайн үед "Г.Занданшатарыг сугарч үлдлээ гэж хэвлэлүүд шүүмжилж бичиж байв. Мөн энэ үеэр казино тоглосон гэх дуулиан;гарсан нь түүнийг дагах муу нэрийн хуудас нь болсон. Гэхдээ л тэр энэ бүхнийг мартагнуулж чадсан. Одоо түүнд юун ЖДҮ-д холбогдож явсан намтар түүх падлий ч байхгүй болж. Ерөнхий сайд У.Хүрэлсүх гэсэн том артай, түүнтэйгээ үг зөрүүгүй, эвлэлдэн хамтарч ажиллах шалгуурыг хангасан нь улс төрийн “умдаг”атгаж яваагийнх нь нэгэн шалтгаан биз ээ.
Эх сурвалж: Ниймийн толь.мн
