Боловсрол, шинжлэх ухааны сайд Л.Энх-Амгалан ажлаа авснаасаа хойш гараагаа аятайхан хийлээ. Хэлж, ярьж, хэрэгжүүлж эхэлж байгаа ажлууд нь таалагдаж байна. Ц.Цогзолмааг эс тооцвол тус яамны сайдууд үндсэндээ салбарынхаа төлөө дуугарч, хийхээсээ илүү өөрт ашигтай хувилбараар ажиллаж ирсэн. Хөлд нь боловсролын салбар их ч үрэгдсэн. Олон ч сайд солигдсон. Ямар сайндаа л өнгөрсөн дөрвөн жилд энэ яамны сайд 4, 5 солигдож байх вэ дээ.
Тэгвэл энэ удаад арай дөнгүүр хүн боловсролын сайдын суудалд суулаа. Хувь хүн талаас нь магтаж байгаа юм биш шүү. Сайдын албанд томилогдсоноосоо хойш барьж буй бодлого нь таалагдлаа. 10 саяас дээш буюу өндөр төлбөртэй хувийн сургуулиудад хувьсах зардал өгөхгүй гэж мэдэгдсэн. Яахав, цахимаар мэдэгдсэн нь зарим нэг хүмүүсийн “мэрэх” сэдэв болно билээ. Тэр ч яахав, “мэрээчид” хаа сайгүй л байдаг хойно. Цаашид бүх хувийн сургуулийн хувьсах зардлыг хасах нь зөв. Тэртэй тэргүй 5, 10, цаашлаад 20, 30 саяын төлбөр төлж чадаж байгаа эцэг, эхчүүд 300, 400 мянган төгрөгийн нэмэгдэлд горойхгүй байх.
Түүний оронд хувьсах зардалд жилд өгч байгаа 20-иод тэрбумаараа улсын сургуулиа өөд нь тат. Шинэ сургууль барь, эцэг, эхчүүдээс анги засварын мөнгө гэж байнга татдаг байдлыг болиул. Улсын сургуулийн чанарыг дээшлүүл. Дундаж амьдралтай эцэг, эхчүүд 5 саяа үрж хувийн сургуульд хүүхдээ явуулахгүй, улсын сургуульд өгдөг болох цагийг хурдан авчрах хэрэгтэй.
Шинэхэн сайд түүнчлэн “Би хамт олонтойгоо уулзаад хэлсэн. БШУЯ тендерийн, барилгын яам биш шүү гэж хэлсэн. 2021 онд хийх бүх тендерийг худалдан авах агентлаг руу 100 хувь шилжүүлж байгаа. Бид тендерт цагаа зараад байх шаардлага огт байхгүй. Цаашдаа ч гэсэн барилгатай холбоотой асуудлыг Барилгын, дулаан цахилгаантай холбоотой асуудлыг Эрчим хүчний яамтай хамтраад шийднэ” гэж ярьсан. Сайн байна. Боловсролын салбарт тендер зарлах, тэндээс нь шат шатны дарга нар нь “хусах”-аас өөр хийх ажил их бий. Наад зах нь сурах бичигтэй холбоотой завхралыг засахгүй бол нохойн баас болж дууслаа. Энэ бүхнийг цэгцлэхэд ажлаа чиглүүлж, тендер “цавчдаг” саадуудаас арай өөрөөр, салбараа анхаарч ажиллах нь гэж найдаж байна. Бусад яамдууд, газар, агентлаг ч гэсэн энэ жишгийг дагах хэрэгтэй. Яг л хариуцсан хариуцсан ажлаа л хийцгээ. Энэ жишгийг тогтоох эхлэлийг Л.Энх-Амгалан тавилаа гэж бодож байна. Харин бусад нь тендерийн “цавчаа”-наасаа зуурах биш сал.
Н.Пунцагболд
