Хууль зүйн байнгын хорооны хуралдаанаар Үндсэн хуулийн цэцийн 08 дугаар дүгнэлтийн тухай хэлэлцэв.

ҮХЦ-ийн Их суудлын хуралдаанаас УИХ-ын дэд дарга Х.Булгантуяаг Үндсэн хууль зөрчсөн, Ерөнхий сайд Г.Занданшатарыг огцруулах тухай УИХ-ын 95 дугаар тогтоол Үндсэн хууль зөрсөн хэмээн дүгнэсэн

Цэцийн дүгнэлт гарсан даруй Ерөнхий сайд, Засгийн газар хэвийн ажиллаж эхэлсэн. Харин Үндсэн хууль зөрчсөн албан тушаалтан эмнэлгийн чөлөөтэй хэмээн бүртгүүлж, түүнтэй холбоотой асуудал хэрхэн нь тодорхойгүй байсаар өнөөдрийг хүрэв.

Нэр бүхий гишүүдийн зүгээс Үндсэн хууль зөрчсөн УИХ-ын дэд даргыг албан тушаалаас нь огцруулаад зогсохгүй эгүүлэн татах ёстой гэдэг байр суурь илэрхийлсээр байгаа. Гэвч өнөөдрийн Хууль зүйн болон Төрийн байгуулалтын байнгын хороод "УИХ-ын дэд даргыг огцруулах асуудлыг нэр дэвшүүлсэн нам, эвслийн бүлгийн хүсэлтээр шийдвэрлэдэг тул МАН-ын бүлэг Үндсэн хууль зөрчсөн албан тушаалтныг огцруулах хүсэлтээ УИХ-д оруулж, нэгдсэн хуралдаанаар шийдвэрлүүлнэ" гэдэг л зүйл хуралдааныхаа төгсгөлд хэллээ.

Хууль зүйн байнгын хорооны хуралдааны үеэр УИХ-ын Д.Ганбат байр сууриа илэрхийлсэн. Тэрбээр үг хэлэх цөөн минутын хугацаандаа ойролцоо суусан Ж.Бат-Эрдэнэ гишүүнтэй ширүүхэн маргаад амжсан юм.

УИХ-ын гишүүн Д.Ганбат "Бид Үндсэн хуулийн цэцийн дүгнэлтийг хэлэлцэж болохгүй. Цэцийн дүгнэлтийг бүгд биелүүлэх ёстой. Дүгнэлт гармагц хүчин төгөлдөр болно. Энэ асуудлыг хэлэлцэхэд Үндсэн хууль зөрчсөн Х.Булгантуяа нь байх ёстой юу. Х.Булгантуяа чинь шөнөжин алх бариад нүдээд байсан биз дээ. Аравдугаар сарын 16-ны хуралдаан Үндсэн хууль зөрчих гээд байгаа юм байна гээд би тэр хуралд суугаагүй. Ирц нь ч бүрдээгүй. 17-ны өглөө би хуралдаа ирсэн. Үндсэн хууль зөрчиж болохгүйг хэд хэдэн гишүүн анхааруулсан. Ийм, ийм ялтай юм байна гээд. Өөрөө ч дараа нь давтаж ярьж байсан. Энэ асуудал хэн нэгэн Булгантуяадаа биш. Хулгай, луйвар чинь гаараад, хууль үйлчлэхээ больсны гор нь ингэж гарч байгаа юм. Баахан нүүрсний хулгайчид нэг талдаа гараад суучихсан. 10 жил эрх барьсан МАН-ын ялзрал ил гарч байгаа нь энэ. Та хэд хулгай, луйвраа дотроо тохироод явна гэж байхгүй. Бид зөвшөөрөхгүй. Энэ чинь парламентыг нэр хүндгүй болгож эцэст нь хатуу гар мөрөөддөг байдал руу оруулж байна. Та нарын яриад байдаг дарангуйлагчийг бий болгож байна. Ийм юм руу л та нар явуулах гээд байгаа шүү" гэв.