Энэ мэдээ хуучирсан буюу 2023/05/29-нд нийтлэгдсэн мэдээ болно.

Оросын хохирол үнэн болов уу?

Украинд дайн болж байна. Энэ бол нийтэд илэрхий зүйл. Цэргийн тусгай ажиллагаа гэдэг нь Украины хил дотор бүх асуудлыг шийдчихнэ гэсэн Оросын анхны төсөл төлөвлөгөө. Тэр нь 3-7 хоногийн гүйцэтгэлтэй байх байсан нь одоо зогсолтгүй үргэлжилсээр жил хагас руугаа дөхөж байна. Бүтэн жил хагас хоёр талаасаа маш ширүүн байлдаад, тэгэх тусмаа хамгийн орчин үеийн хөнөөлтэй зэвсгээр харилцан байлдаж байхад хохирол бага, бараг хохирол амсаагүй гэж ярих нь утгагүй, хэнд ч үнэмшигдэхгүй зүйл юм.

Украины жанжин штаб Оросын талын хохирлыг байнга, өдөр тутам инфографикаар нарийвчлан гаргаж ил мэдээлдэг бол Оросын жанжин штабт аль аль талынх нь хохирлын мэдээ маш нууцлагдсан, ил хэлж болдоггүй зүйл болжээ. Украиныг тэгж их хохироож байна гэвэл үнэмшил багатай, бас энгийн иргэд энгийн хотууд руу пуужин харваж үхэл их дагуулсан нь цэргийн гэмт хэрэгт тооцогдоно гэдэг талаасаа тас нуудаг бол өөрийн хохирлыг огт хэлж болдоггүй, учир нь тийм ихүүлээ алуулж сураггүй алга болоод байгаа нь Оросын нийгмийн тогтвортой байдалд сөргөөр нөлөөлөх тул нууцалсаар байгаад дуусгах нь дээр гэж үзжээ.

сонин mn

Өчигдрийн буюу 5 дугаар сарын 26-ны байдлаар оросын цэргийн хохирол нийт дүнгээрээ 205 мянга 720 гэсэн тоо байна. Бараг 206 мянган цэргээ алуулсан гэдэг маш том тоо юм. Эх орны дайнаас хойш түүхэндээ анх удаа ийм их цэргээ ийм богино хугацаанд устгуулна гэдэг итгэхэд бэрх, бас сэтгэл түгшмээр тоо байна. Өчигдөр гэхэд л 460 орчим орос цэрэг алагдлаа гэсэн байна.

Оросын сэтгүүлчид энэ бүх тоог далдуур нарийвчлан тандан судалж, нэг нартай өглөө гэнэт зарлахад дор бүрнээ бэлтгэж байгаа гэсэн мэдээ оросын нэг сайт дээр явж байна билээ. Тэр үнэн байх. Украинд алагдсан, гэхдээ танигдсан, бичиг баримт нь байгаа орос цэргийн тоогоор Оросын аль аль бүс нутаг, муж илүү их цэргээ алуулсан бэ гэдэг ерөнхий тоо гарчээ.

Тэр тооцоогоор Буриад, Дагестан биш харин цэвэр цусны оросууд зонхилдог Свердловск муж, Краснодарийн хязгаар гэсэн нэр тодорч байна. Хоёр муж нийлээд 24005 цэргээ алуулсан гэсэн мэдээг “Медиазона” суваг руу өгсөн байх юм.

Командлах бүрэлдэхүүнээс алагдсан 1361 офицерын нэрийг нийтэлжээ. Хошуучаас дээш цолтой ахлах офицер, мөн арван хэдэн генерал оролцоод 2063 дээд тушаалын офицероо алдав гэж мэдээлсэн өөр нэг мэдээ сайтад явж байна. Алин нь ч үнэн байлаа гэхэд оросын хувьд маш том хохирол юм. Алагдсан цэргийн албан хаагчдын гуравны нэг нь цэргийн тусгай ажиллагаанаас өмнө Оросын армид алба хааж байгаагүй, дайн эхэлмэгц сайн дураараа байлдахаар очсон, эсвэл шоронгийн ялтан байснаа ЧВК-д элсээд фронтод очигсод байна гэжээ.

Нэрс нь тодорсон, бичиг баримт нь олдсон орос цэргүүдийн тухай ийм тоо хэлж болдог бол ерөнхий баримжаа тоо гэж бас байна. Оросын зарим сэтгүүлчид, гадаадад байдаг оросын чөлөөт хэвлэл, телевизүүдийн мэдээгээр ОХУ-ын цэргийн хохирол “216 мянга” гэсэн нэг тоо явж байна. Тэр нь алагдсан, эсвэл фронтод буцаж очихооргүй зэрэмдэг болсон орос цэргийн тоо энэ ажээ. Энэ тоог барууны тагнуулын ба дайны судалгааны институтууд “250 мянга” гэж хэдэн сарын өмнө баримжаагаар мэдээлж байсан.

Тэгэхдээ энэ дайны оргил үе нь эхний нэг сар буюу Киевийн дэргэд тулж очсон, Харьковыг бүрэн бүсэлсэн тэр үе, хоёр дахь оргил үе нь 2023 он гараад Бахмутын төлөө ширүүн байлдсан тэр өдрүүд гэж цэргийн судлаачид үзэж байна. Яагаад гэвэл үхэл хохирол нь батлаад өгөхөөр байна. Хоригдол ялтан байсан, дараа нь дайчин болоод амиа алдсан 4315 орос залуусын нэрс ил байна. Энэ тоогоор оршуулга болж, цэцгийн хэлхээн дээр нэрийг бичиж хэрээс мод хатгажээ. Гэтэл тэдний командлагч Евгений Пригожин “50 мянга” гэсэн том тоо гэнэт хэлэв. Украинаас салгаж аваад үүрд Оросынх болголоо гэсэн Донецк, Луганск хоёр мужид хэдэн мянган га талбай тэр чигтээ алагдсан цэргийн булшаар дүүрч, хөл гишгэх зайгүй болжээ. Украины хил залгаа оросын мужууд руу ч оршуулгын талбай хүрээгээ тэлж байна. Гамшигт дайны балаг!

Бэлтгэл хошууч Адьягийн Батсайхан

УЛААГЧИН ГАХАЙ ӨДӨР
УЛААГЧИН ГАХАЙ ӨДӨР
 
Т.Мөнхсайхан: Үнэтэй, чанаргүй эмийн асуудалд бодит өөрчлөлт хийнэ
Т.Мөнхсайхан: Үнэтэй, чанаргүй эмийн асуудалд бодит өөрчлөлт хийнэ