Хотын стандарт, хяналтын газраас Зуух, пийшин, яндангийн бүрэн бүтэн байдал, галлагааны ерөнхий шаардлагыг боловсруулж иргэд, олон нийтийн дунд санал явуулж байна.

Уг стандартын төсөлд "Зуухны галын хотлын доторлогоог галд тэсвэртэй шавар ашиглан чанартай хийнэ. Мөн галын хотол хүхээгийг үнс, хөөнөөс хялбар цэвэрлэх боломжтой байхаар зуухыг зохион бүтээх" гэсэн шаардлагыг тусгажээ.

УГААРЫН ХИЙГЭЭС УРЬДЧИЛАН СЭРГИЙЛЭХ АРГА ХЭМЖЭЭ

Угаарын хий нь зуухан дотор агаарын эргэлт муутай, хүчилтөрөгч хангалтгүй нөхцөлд үүсдэг ба түлш шатаж эхлэх болон шатаж дуусаад гал бөхөх үед ихээр үүсдэг. Иймээс яндангийн таталт сайн байх шаардлагатай.

Хэрэв яндангийн таталт муу байвал зуухны ам болон эвдрэл, гэмтлийн улмаас үүссэн завсар зайгаар гэр дотор угаарын хий тархаж уушгиар дамжин цусны урсгалд орж хүний бие махбод, эд эсэд очих хүчилтөрөгчийн хэмжээг багасган аминд хүрэх эрсдэлийг бий болгодог.

Иймд дараах урьдчилан сэргийлэх арга хэмжээг авахыг зөвлөж байна.

• Зуухны гагнаас, холбоос, яндан, ханан пийшингийн худаг нь технологийн дагуу хийгдэж, угсрагдсан байх шаардлагатай.
• Сайжруулсан түлшний шинж чанарт тохирсон, халалтын температурыг даах материалаар хийгдсэн, холбогдох стандартын шаардлага хангасан, тохирлын гэрчилгээтэй зуух ашиглана.
• Зуух, пийшинг үйлдвэрлэгчийн зааврын дагуу ашиглах, улирал бүр цэвэрлэж хөөлнө.
• Зуух, пийшингийн аюулгүй ажиллагааг хангаж зөв суурилуулна.
• Яндангаар ус орж, хөөг норгон лаг үүсгэх, яндан, ханан пийшингийн худгийг бөглөхөөс сэргийлэх арга хэмжээг авна.
• Яндан, ханан пийшингийн бүх худгийг цэвэрлэж хөөлнө.
• Галлагааг технологийн дагуу хийнэ.
• Зуух пийшинд агаар өгөх агаарын нээлхийг бүрэн хаахгүй, тохиромжтой хэмжээний зай үлдээнэ.
• Зуухны ам, үнсний тосгуур нь тал бүрдээ битүүмжлэгдсэн, шаталтыг тэтгэх, агаар сорох нүх нь зохих хэмжээнд байна.
• Гэр, сууцанд тогтмол агааржуулалт хийх шаардлагатай

Суурилуулалт

• Зуух пийшинг тэгш хөдөлгөөнгүй хэсэгт, галд тэсвэртэй үл шатах материал дээр байршуулна.
• Ханан пийшингийн зуух холбох хэсэг нь яндангийн таталтад сөргөөр нөлөөлөхгүй, утаа чөлөөтэй урсаж байхаар, эргэлт, булан тохой багатай байна.
• Бүх гадарга нь жигд, ялангуяа доод хэсэг болон сүүлийн худгууд нь аль болох сайн халж хоногийн бүх хугацаанд буюу дараагийн галлагаа хүртэл сууцны халаалтыг жигд барьж байх ёстой.
• Зуухыг ханан пийшинд шулуун холбоход холбогчийн доод огтлол 110ммХ110мм - 140ммХ140мм, урт нь 100мм - 250мм, өнцөг холболтын дотор огтлол 140ммХ140мм -ээс багагүй, урт нь 250мм хүртэл, 120-оос дээш градус налуу байна.

Галлагааны заавар

/Сайжруулсан зуухны хувьд/

• Зуух пийшингийнхээ үнсний савыг цэвэрлэсэн байх шаардлагатай.
• Шахмал түлшээ доор нь хийгээд дээрээс нь модоо ноцоож асаана.
• Галлаж эхлэхдээ агаар соролтын хавхлагыг нээх нь асалтыг түргэсгэнэ.
• Галлагаа хийж байгаа тохиолдолд яндангийн сойлт буюу хаалтыг хаахгүй байх, пийшин зуухныхаа онцлогт тохируулж галлана.
• Шинэ түлшийг нэмэхдээ цогийн хэмжээнээс ихгүй түлш нэмэх, эсвэл цогшсон түлш дээрээ шинэ түлшээ бага багаар нэмбэл зохистой.
• Галын хотолд түлшээ хийж бэлтгэн дээрээс нь 500-1000гр орчим мод өрж зөвхөн дээрээс галлана.
• Түлш ноцох үед дээд доод агаарын хаалтыг нээсэн байх шаардлагатай.

/Уламжлалт зуухны хувьд/

• Цуулсан модоо шатах материалаар асааж сайтар ноцсоны дараа 2-3 кг сайжруулсан шахмал түлшээ дээрээс нь нэмж хийнэ.
• Галлаж эхлэхдээ үнсний савыг 3 см орчим нээх нь зуух пийшингийн таталт буюу агаарын соролтыг сайжруулж асалтыг түргэсгэнэ.
• Галлагаа хийж байгаа тохиолдолд яндангийн сойлт буюу хаалтыг хаахгүй, пийшин зуухныхаа онцлогт тохируулж галлах шаардлагатай.
• Түлш шатаж эхэлснээс хойш хагас цагийн дараа галын хотолд утааны таталтад нөлөөлөхгүй байхаар түлшээр дахин цэнэглэнэ.
• Түлш унтрахаас өмнө буюу дөлтэй үед түлшээ нэмбэл зохистой.

/Ханан пийшингийн хувьд/

• Галлагааны зарчим ижил бөгөөд ханан пийшингийн агаар таталт сайн байх ёстой. Мөн зөв технологийн дагуу барьсан байх шаардлагатай.
• Шахмал түлшээ доор нь хийгээд дээрээс нь модоо ноцоож асаана.
• Галлагаа хийж байгаа үед яндангийн сойлт буюу хаалтыг хаахгүй, пийшин зуухныхаа онцлогт тохируулж галлана.
• Шинэ түлшийг нэмэхдээ цогийн хэмжээнээс ихгүй түлш нэмэх эсвэл цогшсон түлш дээрээ шинэ түлшээ бага багаар нэмнэ.

Сайжруулсан түлш

• Сайжруулсан түлшийг галын хотолд голлуулан бөмбөлөг бөгөөд бөөрөнхий хэлбэртэйгээр байршуулна.
• Галын хотлын шүүрээс сайжруулсан түлшийг илүү гаргаж тавихгүй байх.
• Модоо сайжруулсан түлшнийхээ урд хэсэгт байрлуулан ноцооно.

Яндан, яндан зуухны холбоос

• Яндангийн диаметр 100 мм, гэрийн тооно болон барилгын дээврээс 700 мм-ээс илүү гарахаар өндөр байх.
• Утааны яндангийн өндрийг үнсний сараалжны түвшнээс яндангийн дээд амсар хүртэл 5 м-ээс багагүй байхаар төлөвлөнө.
• Дээврийн цул хийцээс дээш гарах утааны яндангийн өндрийг дараах байдлаар тооцож авна:

-Хавтгай дээвэр дээр 500 мм-ээс багагүйгээр хийнэ.

Зуухны цэвэрлэгээ

• Зуухыг галлах бүрд үнсний савыг цэвэрлэх шаардлагатай.
• Түлшний шаталтын явцад агаар өгөлтийг сайжруулахын тулд өдөрт нэгээс доошгүй удаа үнсний савыг цэвэрлэнэ.
• Ул ширэмний зай, завсар зуухны доод ханыг тогтмол цэвэрлэнэ.
• Нээлхий болон бөглөөг нээхэд хялбар, сойз, үлдэгдлийг хусах, хамах хэрэгслийг ашиглан утааны хийн талаас бүх гадаргууг шалгаж цэвэрлэнэ.

Түлш хадгалалт

-Агааржуулалт сайтай, усанд норохгүй, чийг авахгүй нөхцөлд хадгалах.

Мөн түлшний овоолго 1.5м-ээс өндөргүй, өргөн 5м-ээс илүүгүй байх шаардлагатай.

Харин хурдан шатах, тэсэрч дэлбэрэх /хий, шингэн/ зүйлтэй ойр байлгаж хадгалахыг хориглоно.

Зуух, пийшин, яндангийн бүрэн бүтэн байдал, галлагаанд мөрдөгдөх стандартын төслийн дэлгэрэнгүйг ЭНД дарж үзэх боломжтой.