Э.Миеэгомбо нь Баянгол дүүргийн ИТХ-ын төлөөлөгчөөс гадна нэртэй зохиолч болно. Тэрээр “Хотжилт” хэмээх том роман бичсэн. Баянголын ИТХ авъяаслаг зохиолч төлөөлөгчөө дэмжин уг романаас 90 ширхэгийг 1,8 сая төгрөгөөр худалдан авч байсан. ИТХ-ын цахим хуудас дахь зохиолч төлөөлөгчийн ажлын арвин түүхийг харахад дүүргийн “Усан спорт сургалтын төв” ОНӨААТҮГ-ын даргаар ажиллаж байснаа огт дурдаагүй байна. Энэ нь ч учиртай. Саяхан экс даргатан тэнд бужигнуулсан хэрэгтээ шүүхээр шийтгүүлсэн. Тэрээр уг төвийг даргалж байхдаа өөрийн “Хас” банкинд бүртгэлтэй ПОС машинаар 2021 оны 3-р сараас 2022 оны 9-р сарын хооронд 680 удаагийн үйлчилгээний орлогыг уншуулан 58,4 сая төгрөг завшсан хэрэгт холбогдсон. Үүнд няраваар ажиллаж байсан, өдгөө тэтгэвэрт гарсан Ч.Ганболд “тусалсан”. Нярав ахаараа дамжуулан ахиад зургаан саяын орлого завшсан гэж тогтоогджээ. Пос машины хэрэгт дарга нярав хоёроос гадна угтах үйлчилгээний ажилтан Д.Уянга оролцжээ. Тэрээр 58 саяын тооцоог даргын ПОС-оор уншуулсан гэнэ. Дарга хувийнхаа посыг авчраад орлого уншуулж байгаа нь төвийн ажилтнуудын нүдний өмнө улаан цайм явагджээ.
“... Нэг өдөр ажилдаа ирэхэд угтах үйлчилгээний ширээн дээр пос машин байсан. Пос машинтай болсон юм уу гэхэд Миеэгомбо дарга авчирч өгсөн гэж хэлж байсан ...”
“...Би 2021 оны 9-р сараас Усан спорт, сургалтын төвд нягтлан бодогчоор ажилласан.Нэг удаа Гомбожав надад дарга пос машин угтах үйлчилгээ дээр уншуулаад байна гэсэн. Би энэ талаар даргаас асуухад “тийм юм байхгүй, та өөрийнхөө ажлыг хий, би энэ дээр хяналтаа тавьж байгаа” гэсэн. Уг нь миний ажлын нэг үүрэг орлого төвлөрүүлэх ёстой ч угтах үйлчилгээний ажилтан, нярав хоёр намайг орлогын гүйлгээнд огт оролцуулдаггүй байсан. Учир нь Миеэгомбо дарга намайг орлого төвлөрүүлэхэд оролцохыг хориглож, орлогыг няраваар ирсэн настай ах Ганболд, угтах үйлчилгээний ажилтан Уянга хоёрыг хариуцахад болно гэсэн. Намайг байгууллагын орлого бүрдүүлэлтэд оролцуулаагүйн улмаас сар бүр алдагдалтай гардаг болсон. Үүнийг Миеэгомбо даргад танилцуулж, удаа дараа шаардлага тавихад “та яагаад миний түрүүвч рүү өндийгээд байгаа юм бэ, би өөрөө мэдэж байна” гэж уурласан. Тэгээд би арга буюу өөрийн хүсэлтээр ажлаа өгөөд гарсан. Угтах үйлчилгээ дээр байсан пос машин бол манай байгууллагын нэр дээрх пос машин биш байсан...”
Усан спорт, сургалтын төвийн үйлчилгээний орлого өөрийх нь түрүүвч рүү орох ёстой гэж үзсэн Э.Миеэгомбо нь даргаар ирэнгүүтээ сарын дараа Ч.Ганболд, Д.Уянга нарыг ажилд авчээ. Экс даргатан албан тушаалаа ашиглаж их хэмжээний хохирол учруулсан хэргээс гадна мөрдөн байцаалтын шатанд гэрчид нөлөөлж зориуд худал мэдүүлэг өгөх гэмт хэрэг үйлдсэн байна. Анхан шатны шүүх Баянголын ИТХ-ын зохиолч төлөөлөгчийг нийтийн албанд томилогдох эрхийг нь таван жилээр хасаж 27 сая төгрөгөөр торгожээ. Түүний хоёр “цэрэг” болох няравыг 5,4 сая, угтах үйлчилгээний ажилтанг 6,5 сая төгрөгөөр торгосон байна. Өдгөө төлөөлөгч нь их хэмжээний торгуульд унасан тул Баянголын ИТХ ахин “дэмжлэгийн” гараа сунгаж “Хотжилт” романаас нь худалдаж авах байх даа ...
