Энэ хэрэг нь ХХБ-нд дотоод хяналт маш суларч, өндөр дүнтэй хадгаламж эзэмшигчид эрсдэлд орох аюултай болсоныг харуулж байна. Мөн банкны ажилтны ёс зүй ихээхэн алдагджээ. Тус банкны Баянзүрх дүүргийн 7-р хороонд орших салбарын банкны данс хариуцсан ахлах ажилтан Ц.Эрдэнэбаатар нь 2021 оны 9-р сарын 1-ний өдрөөс 2022 оны 10-р сарын 19-ний өдрийг хүртэлх хугацаанд буюу бүтэн жилийн турш их хэмжээний хадгаламжтай данс эзэмшигч О.О, С.Т нарын дансны мэдээллийг өөрчлөн, өөрийн захирах эрхэнд оруулан, интернэт банкаар нь 61 удаагийн зээлийг гаргуулан авч хувьдаа завшиж банкинд 2,6 тэрбум төгрөгийн хохирол учруулсан гэмт хэрэгт холбогджээ. Шүүгдэгч нь 2014 онд борлуулалтын ажилтнаар орж, хоёр жилийн дараа данс хариуцсан ахлах ажилтан болж дэвшсэн. Гэсэн ч цахим мөрийтэй тоглоомд орж бүр донтсон гэдгээ өөрөө ч хүлээн зөвшөөрчээ.
Хохирогч болох данс эзэмшигчид ийн мэдүүлжээ.
“...2021 оны 8-р сард эхнэр бид хоёр ХХБ-ны Баянзүрх дүүргийн салбарт тус тусдаа 850 сая төгрөгөөр хадгаламжийн данс нээлгүүлсэн. Тэгэхэд салбарын эрхлэгч ч юм шиг, менежер ч юм шиг Эрдэнэбаатар гээд залуу байсан. 2022 оны 10-р сард банкны хуулийн албаны дарга нь дуудаж “Та хоёрын анх гэрээ байгуулсан салбарын Ц.Эрдэнэбаатар гэх ажилтан та болон таны эхнэрийн хадгаламжийн дансыг барьцаалан зээл авсан байна, бид цагдаад хандсан, цагдаагаас дуудах байх” гэсэн...”
Ахлах ажилтан нь “1xBet” сайтын Ц.Н, О.Д, Н.А гэх гурван агент руу 2,6 тэрбум төгрөг шилжүүлж өөрийн 405842433 дугаартай аккаунтыг цэнэглүүлжээ.
“... Би 2018 оноос Poker stars аппликешнээр орж өөрийнхөө тоглож эхэлсэн. 2020 оноос Bet 365 гэдэг аппликешинээс янз бүрийн тэмцээнүүд дээр бооцоо тавьж эхэлсэн. Тэр хугацаанд би банк болон салбартаа удаан хугацаагаар ажилласан, харилцагч болон танил тал олонтой болсон тул тэднээс бага багаар мөнгө зээлж тоглож ирсэн. Ингэсээр өр 50 сая гарсан. 2021 он гараад хүмүүс надаас мөнгөө нэхэж эхэлсэн тул өрөө дарах арга зам хайсан. Салбарын даргыг эзгүйд би орлодог тул хадгаламж нээлгүүлж байгаа мөнгөтэй хүмүүстэй танилцаж харилцаа үүсгэсэн. 8-р сард баян эхнэр нөхөр хоёр тус тусдаа 800 сая төгрөгийн хадгаламж нээлгэсэн. Тэгэхэд нь данс эзэмшигчийн хүсэлтийг өөрчлөн утасны дугаарыг нь сольж бас гарын үсгийг нь дуурайлгаж зурсан. Ингэж мэдээллийг нь өөрчлөөд тэр эхнэр нөхөр хоёрын хадгаламжийн интернэт банкийг нь өөрөө ашиглах эрхтэй болсон. Тэгээд хадгаламжийг нь барьцаалан гаргаж болох дээд хэмжээгээр нь буюу нэг удаадаа 20-30 сая төгрөгийн зээл аваад шууд 1xbet-ийн аккаунтаа цэнэглэн тоглож эхэлсэн. Заримдаа хожсон мөнгөнөөсөө өмнөх өрөөэ дараад, мөнгөгүй болохоороо ахин зээл авч тоглосоор жилийн хугацаанд гурван тэрбум орчим төгрөгийг тухайн хүмүүсийн хадгаламжаас аваад тоглочихсон. Тухайн мөнгө мөрийтэй тоглоомд бүрэн зарцуулсан. Надад одоо мөнгө байхгүй. Хийсэн үйлдэлдээ зохих хэмжээний хорих ялаа эдэлж гарч ирээд л төлнө дөө ...”
Салбарт нь ийм ноцтой мөнгө идэлт явагдаж байхад бүтэн жилийн дараа л мэдсэн банкны удирдлага “уур”-аа Ц.Эрдэнэбаатарын дансыг цэнэглэсэн “1xBet” сайтын гурван агентад гаргаж тэднийг мөнгө угаасан хэрэгт буруутгажээ.
“...Ц.Н О.Д Н.А нар нь онлайн валютын үйл ажиллагааг эрхлэх тусгай зөвшөөрөлтэй этгээд биш байх бөгөөд Ц.Эрдэнэбаатарын цахим мөрийтэй тоглоомын дансыг цэнэглэсэн үйлдлийг хууль бус үйлдэл гэж үзнэ. Тэд өөрийн үйлдлийн үр дагаврыг урьдаас мэдэх ёстой байсан, түүнээс зайлсхийх боломжийг ашиглаагүй, хөнгөмсгөөр хандсанаар бусдын эд хөрөнгийн эрхэд хууль бусаар халдсан гэж үзэх, түүнчлэн цахим мөрийтэй тоглоомын дансыг цэнэглэж өгөөгүй бол банканд учруулсан хохирлын хэмжээ бага байх, цаашлаад бүр хохирол учруулахгүй байх боломжтой байсан...”
“1xBet” сайтын тоглогчдын дансыг цэнэглэж, хожсон тохиолдолд шагналын мөнгө татаж өгөөд тодорхой хувийг нь авдаг гурван агент бидэнд ямар ч хамаагүй гэжээ.
“... Эрдэнэбаатар гэх хүнийг танихгүй. Ер нь ганцхан хүнтэй харьцаад байдаггүй, өдөрт 5-6 хүн дансаа цэнэглүүлдэг тул наадах чинь ямар учиртай мөнгө вэ гэж нэг бүрчлэн асуудаггүй байгаа ...”
Шүүгдэгч банкнаасаа ипотекийн зээл авсан агаад байрыг буцаан авч, төлсөн төлбөрийг нь мөн буцаан гаргуулахаар иргэний шүүхээр хэлэлцэгдэж байгаа гэнэ. Анхан шатны шүүх Ц.Эрдэнэбаатард дөрвөн жилийн хорих ял оногдуулж, 2,6 тэрбум төгрөг гаргуулахаар шийдвэрлэснийг ХХБ эсэргүүцэж давж заалдсан ч амжилтгүй болжээ.
