Улс орон даяар өвөлжилт, хаваржилтын бэлэн байдлын үнэлгээ хийх, малчид, хоршоологчдоо сонсох, санал хүсэлтийг нь авах, зөвлөн туслах чиг үүрэг бүхий Шуурхай бүлгүүд Говь-Алтай, Дорноговь, Сэлэнгэ, Архангай, Булган, Дундговь, Баян-Өлгий, Баянхонгор, Говь-Сүмбэр аймгуудад ажиллаж эхэллээ.
Монгол Улсын Шадар сайд, Шинэ хоршоо хөдөлгөөний салбар дундын уялдааг хангах Үндэсний хорооны дарга С.Амарсайханы тушаалаар 21 аймаг, 330 суманд өвөлжилт, хаваржилтын бэлтгэл ажлын явцтай танилцах, зудын эрсдэлийн үнэлгээ хийх, болзошгүй аюул гамшгаас урьдчилан сэргийлэх, “Шинэ хоршоо-Чинээлэг малчин” хөтөлбөрийн хэрэгжилттэй холбогдуулан малчдын санал хүсэлтийг авах, зээлийн зарцуулалт, төсөл хөтөлбөрийн хэрэгжилтийн үр дүнг дүгнэх, мэргэжил арга зүйн дэмжлэг үзүүлэх ажлыг улсын хэмжээнд зохион байгуулах шуурхай бүлэг томилж ажиллуулах үүргийг 21 аймгийн онцгой комиссын дарга, гишүүдэд өгсөн.
“Шинэ хоршоо хөдөлгөөн” өрнөж эхэлснээс хойш 6 сарын хугацаанд 6599 шинэ хоршоо байгуулагдаж, 68.500 малчид хоршоонд гишүүнээр элссэн байна. Мөн нийт 556 тэрбум төгрөгийн хөрөнгө оруулалтын зээлийг 16.399 малчин хоршоологчдод олгосон.
“Шинэ хоршоо хөдөлгөөн” тогтвортой үргэлжилснээр мал аж ахуйн салбарыг уур амьсгалын өөрчлөлтийн сөрөг нөлөөллөөс хамгаалах, гэнэтийн гамшиг ослын үеийн эрсдэлийг бууруулах, малчин өрхийн амьжиргааг дэмжих, орлогыг нэмэгдүүлэх, мал, малын гаралтай түүхий эд, бүтээгдэхүүний мөнгөн урсгалыг тогтмолжуулах, хүнсний аюулгүй байдал, тогтвортой нийлүүлэлтийг бий болгох, хоршоологч, үйлдвэрлэгчийн түншлэлийг дэмжиж, жижиг, дунд үйлдвэрлэлийг тогтвортой хөгжүүлэх, хөдөөгийн сэргэлтийг бодит ажил болгох зэрэг ач холбогдолтой.
